މިހާރު ފެނިގެންދަނީ ސަރުކާރުގެ ތެރޭގައި އޮންނަންޖެހޭ ގުޅުންތައް އެއްވެސް ވަރަކަށް ނެތް މަންޒަރު ކަމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
އަންގާރަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޝާހިދު ވިދާޅުވީ ސަރުކާރުގެ އެތެރޭގެ ގުޅުން ކުޑަކަން ފާހަގަކުރެވޭ ކަމަށެވެ. އަދި މިހާރު ފެންނަމުންދަނީ "ރޫޅި، ވަކިވެ، ބަލިކަށިވެފައިވާ ސަރުކާރެއްގެ ސިފަތައް" ކަމަށް އެމަނިކުފާނު ވިދާޅުވިއެވެ.
ޝާހިދު މި ވާހަކަތައް ދެއްކެވީ ބޭންކް އޮފް މޯލްޑިވްސް (ބީއެމްއެލް) އާ މެދު ސަރުކާރުން ކުރަމުންދާ ތުހުމަތުތަކާ ގުޅިގެންނެވެ. އެމަނިކުފާނު ވިދާޅުވި ގޮތުގައި ބީއެމްއެލްއާ މެދު ބަޣާވާތްކުރަން އުޅުނު ކަމުގެ ތުހުމަތު ސަރުކާރުން ކުރުމަކީ "ވަރަށް ބޮޑަށް ބޭންކުގެ އަގު ވެއްޓޭނެ ކަމެއް" ކަމަށެވެ.
ޝާހިދު ފާހަގަކުރެއްވި ގޮތުގައި ބީއެމްއެލްގެ ކާޑުތަކުން ކުރެވޭ ބޭރުގެ މުއާމަލާތްތަކުގެ ލިމިޓަށް ގެނެވުނު ބަދަލު އިޢުލާންކުރުމުން، ސަރުކާރަށް ނިސްބަތްވާ މަޖިލިސް މެންބަރުންނާއި ބައެއް ވަޒީރުން އެކަން ދިފާޢުކޮށް ވާހަކަދެއްކި ކަމަށެވެ. ނަމަވެސް ފަހުން ސަރުކާރުގެ ރާގު ބަދަލުވެގެން ދިޔައީ ކުއްލިއަކަށް ކަމަށް ޝާހިދު ވިދާޅުވިއެވެ.
އެމަނިކުފާނު އިތުރަށް ވިދާޅުވީ 2023 ވަނަ އަހަރު ރައްޔިތުން ސަރުކާރަށް ފާރަވެރިވުމުގެ ޒިންމާ އެމްޑީޕީއާ ހަވާލުކޮށްފައިވާ ކަމަށެވެ. އަދި ރިޔާސީ އިންތިޚާބުގައި އެމްޑީޕީއަށް "ލައްކައަކަށް ވުރެ ގިނަ" ވޯޓު ލިބުމުން އާންމުން ސަރުކާރު ޖަވާބުދާރީ ކުރުވަން ބޭނުންވާކަން އެނގޭ ކަމަށްވެސް ޝާހިދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
