މަޖިލީހުގެ މެންބަރުންނަށް މުލިއާގެއިން ފައިސާ ދޭކަމުގެ ދޮގު ތުހުމަތު އަބްދުއްރަހީމް ދޮގުކުރައްވައިފިއެވެ.

މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް އަބްދުﷲ ވަނީ ސަރުކާރު ތަމްސީލުކުރާ މެންބަރުންނަށް މުލިއާގެއިން މަހަކު 50,000 ރުފިޔާ ދޭކަމަށް ކުރެވޭ ތުހުމަތުތައް ދޮގުކުރައްވާ މިރޭ އެކަމާ ދެކޮޅަށް ވާހަކަ ދައްކަވާފައެވެ.

މިރޭ ސަންގުޓީވީގައި އަބުދުއްރަހީމް ވާހަކަފުޅު ދައްކަވަމުން ވިދާޅުވީ ސަރުކާރު އުފެދުނު ފަހުން، އަމާޒު ކުރާ ފާޑުކިއުންތަކުގެ ތެރޭގައި މެމްބަރުންނަށް ނުފޫޒު ފޯރުވުމަށް މަސައްކަތް ކުރާކަމަށް ތުހުމަތު ކުރި ނަމަވެސް އެކަން އެބޭފުޅުން ދޮގު ކުރައްވާކަމަށެވެ. އަދި މަޖިލީހުގެ ތެރެއިން ހުރިހާ މަސައްކަތެއް ކުރުމުގައި ސަރުކާރަށް އެއްބާރުލުން ދޭނެކަމުގެ ޔަގީންކަން މެމްބަރުން ވަނީ ދެއްވާފައި ކަމުގައެވެ. އެހެންކަމުން މެމްބަރުންނަށް ފައިސާދޭންޖެހޭ ސަބަބެއް ނެތްކަމަށް އޭނާ ވިދާޅުވިއެވެ. 

އަބްދުއްރަހީމް ވިދާޅުވީ، ރައީސް މުޢިއްޒަކީ ރިޝްވަތު ދީގެން މެންބަރުން ގަންނަން އުޅުއްވާ ބޭފުޅެއް ނޫންކަމަށެވެ. އޭގެ ބަދަލުގައި، ރައްޔިތުންގެ އިތުބާރު ލިބިވަޑައިގެންފައިވާ ބޭފުޅެއްކަން 75 މެންބަރުން އެމަނިކުފާނަށްޓަކައި ރައްޔިތުން ހޮއްވަވައި ދެއްވުމުން އެކަން ސާބިތުވާކަމަށް އަބުދުއްރަހީމް ވިދާޅުވިއެވެ.

އަބްދުއްރަހީމް އިތުރަށް ވިދާޅުވީ، ރައީސް މުޢިއްޒު ކުރީގެ ރައީސް ޔާމީނާ ތަފާތުވާނެ ކަމަށެވެ. އެމަނިކުފާނަކީ އިންސާނިއްޔަތުކަމާއެކު މުޢާމަލާތްކުރައްވާ، މީހުންނަށް އަޅާލައްވާ ބޭފުޅެއްކަމަށް ފާހަގަކުރެއްވިއެވެ. އެހެންކަމުން، ވެރިކަމަށް ވަޑައިގެން ހުރިހާ އުސޫލެއް ދޫކޮށްލައްވާ ފައިސާ ބައްސަވާނެކަމަށް ނުބެލެވޭކަމަށް އަބްދުއްރަހީމް ވިދާޅުވިއެވެ.