ޖަޕާނުގެ ހުޅަނގު ދެކުނުގައި އުފެދިފައިވާ ތޫފާން ޝަންޝާންގެ ސަބަބުން އެތައް ބަޔަކު ޒަހަމްވެ، މިލިއަނެއްހާ ގޭބިސީގެ ހަތަރުބައިކުޅަ އެއްބައި ގޭބިސީއަށް ކަރަންޓު ކެނޑިފައިވާ ކަމަށް މީޑިއާ ރިޕޯޓިތަކުން ބުނެފިއެވެ.

ޖަޕާނުގެ މީޓިއޮރޮލޮޖިކަލް އެޖެންސީން ބުނީ ގަޑިއަކު 252 ކިލޯމީޓަރު (157 މޭލު) ބާރުމިނުގައި ވައިގަދަވެ ބޯކޮށް ވާރޭ ވެހިފައިވާ މި ތޫފާން ބުރާސްފަތި ދުވަހުގެ ހެނދުނު 8:00 ހާއިރު ކިއުޝޫ އައިލެންޑްގެ ސަޓްސުމަސެންޑާއީ ސިޓީ ކައިރިއަށް އަރާފައިވާ ކަމަށެވެ.

އަދި 24 ގަޑިއިރުގެ ތެރޭގައި ކިއުޝޫއަށް 60 ސެންޓިމީޓަރު (23.6 އިންޗި) ގެ ވާރޭ ވެހޭނެ ކަމަށް އެ އިދާރާއިން ވަނީ ލަފާކޮށްފައެވެ.

ޕަބްލިކް ބްރޯޑްކާސްޓަރު އެންއެޗްކޭއިން ރިޕޯޓްކޮށްފައިވާ ގޮތުގައި ކަގޯޝިމާ އާއި މިއާޒާކީ ޕްރިފެކްޗާތަކުގައި އެކަކު ގެއްލި 39 މީހިންވަނީ ޒަހަމްވެފައެވެ.

"އަހަރެމެންގެ ގެ ރަނގަޅު، އެކަމަކު މިއާޒާކީގައި ތޫފާނެއް އައިސް ބައެއް ތަންތަނުން ކަރަންޓް ކެނޑިއްޖެ. މިއީ ކަންބޮޑުވާ ކަމެއް،" އޭއެފްޕީ ނިއުސް އެޖެންސީއަށް ދިން އިންޓަވިއުއެއްގައި އުމުރުން 18 އަހަރުގެ ދަރިވަރު ބުނެފައިވެއެވެ.

ޖަޕާން ޓައިމްސް އިން ބުނީ އޮއިޓާ ޕްރިފެކްޗާގެ ޔޫފޫ ސިޓީގެ މިޔަކަވާ ކޯރުގެ އައްސޭރި ފަޅައިގެން ދިއުމާ ގުޅިގެން ލެވެލް 5 ގެ އިމަޖެންސީ އެލާޓް ނެރެފައިވާ ކަމަށެވެ.