ފިޗް ރޭޓިންގްސް އިން ދިވެހިރާއްޖޭގެ ކްރެޑިޓް ރޭޓިންގ "ސީސީސީ+" އިން "ސީސީ" އަށް ދަށްކޮށްފައިވާތީ ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން ކަންބޮޑުވުން ފާޅުކޮށްފިއެވެ. މިއީ ވޭތުވެދިޔަ 3 މަހުގެ ތެރޭގައި ދެވަނަ ފަހަރަށް، އަދި އެއްފަހަރާ 3 ދަރަޖަ ތިރިއަށް ކްރެޑިޓް ރޭޓިންގ ދަށްކުރުމެކެވެ.

އެމްޑީޕީން ނެރުނު ނޫސްބަޔާނުގައި ބުނެފައިވަނީ މިހާރުގެ ސަރުކާރުން ގެންގުޅޭ ދޯހަޅި ސިޔާސަތުގެ ސަބަބުން މާލީ ހާލަތު އިންތިހާއަށް ގޯސްވަމުންދާ ކަމަށެވެ. މާލީ ހާލަތު ގޯސްވަމުންދާކަން ރަމްޒުކޮށްދޭ ކަންކަމުގެ ތެރޭގައި ދައުލަތުގެ ޚަރަދު ބޮޑުވުމާއި، މާލީ އިސްލާހުތައް ލަސްކުރުމާއި، ރާއްޖޭގެ ރަސްމީ ރިޒާވް މެނޭޖްނުކުރެވި ދަށަށް ދިއުމާއި، ބޭރުން ފައިސާ ހޯދުމަށް ނުކުޅެދިފައިވުން ހިމެނޭ ކަމަށް އެމްޑީޕީން ފާހަގަކޮށްފައިވެއެވެ.

އަސްކަރީ ޑްރޯންތަކަށް 37 މިލިއަން ޑޮލަރު ކަނޑައެޅުމާއި ޕްލޭން ނުކުރާ 50 މިލިއަން ޑޮލަރުގެ ޓްރެޜަރީ ބިލް އަނބުރާ ދެއްކުން ފަދަ ޒަރޫރީ ނޫން ޚަރަދުތަކުގައި ބައިވެރިވުމަށް ސަރުކާރުން ނިންމި ނިންމުމުގެ ސަބަބުން، ރާއްޖޭގެ މާލީ ޙާލަތު އިތުރަށް ގޯސްވެފައިވާކަމަށްވެސް އެބަޔާނުގައި ބުނެފައިވެއެވެ.

އެމްޑީޕީން އިތުރަށް ފާހަގަކޮށްފައިވާ ގޮތުގައި، ސަރުކާރުގެ ޢަމަލުތަކުގެ ސަބަބުން ފަތުރުވެރިކަމަށާއި އިޤްތިސާދަށް ވަނީ ގެއްލުން ލިބިފައެވެ. ޚާއްޞަކޮށް އިންޑިއާއާއެކު އޮތް ގުޅުން ހީނަރުވުމުގެ ސަބަބުން ރާއްޖެއަށް އިންޑިއާއިން ޒިޔާރަތްކުރާ ފަތުރުވެރިންގެ އަދަދު ބޮޑުތަނުން މަދުވެފައިވާ ކަމަށް ބުނެފައިވެއެވެ.

އެމްޑީޕީން ސަރުކާރަށް ގޮވާލާފައިވަނީ މި ނުރައްކާތައް ކުޑަކުރުމަށް ވަގުތުން ފިޔަވަޅު އަޅަން ފެށުމަށެވެ. މީގެ ތެރޭގައި ބޭކާރު ޚަރަދުތައް ހުއްޓައިލުމަށާއި މާލީ އިސްލާހުތައް އަވަސް ކުރުމަށާއި، ރަހުމަތްތެރި ޤައުމުތަކާއި ބައިނަލްއަޤްވާމީ އިދާރާތަކުގެ އެހީތެރިކަން ހޯދުމަށް ގޮވާލާފައިވެއެވެ. އަދި ދައުލަތުގެ މާލީ ހިސާބުތައް ޢާންމު ކުރުމަށް އަލުން ފެށުމަށާއި ރައްޔިތުންނަށް ތެދު ހާމަކުރުމަށްވެސް އެމްޑީޕީން ގޮވާލާފައިވެއެވެ.

އަވަހަށް ފިޔަވަޅު ނޭޅިއްޖެނަމަ، މާލީ ހާލަތު އިތުރަށް ދަށަށް ދިއުމާއި، ކްރެޑިޓް ރޭޓިންގ އިތުރަށް ދަށަށް ދިއުމާއި، އަދި އިޤްތިޞާދީ ހާލަތު އިތުރަށް ހީނަރުވުމުގެ ނުރައްކާ ބޮޑުކަންވެސް އެމްޑީޕީން ފާހަގަކޮށްފައިވެއެވެ.