ތަހުގީގެއް ކުރަން ފެށުމަކީ އަދި ގޮތެއް ނިންމުމެއްނޫން ކަަމަށާއި، ސަރުކާރު ވައްޓާލަން އުޅުނު ކަމަށް ކުރެވޭ ތުހުމަތާ ގުޅިގެން ފުލުހުން ކުރަން ޖެހޭ ތަހްޤީޤު ކުރާންޖެހޭނެކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި އިހުސާން ވިދާޅުވީ، ފުލުހުން މައްސަލައެއް ތަހުގީގު ކުރަން ފެށުމަކީ ގޮތެއް ނިންމުމެއް ނޫން ކަމަށާއި، ތަހުގީގުގެ ނަތީޖާއަށް ބަލައި ފިޔަވަޅު އަޅާނެ ކަމަށެވެ.

ހޯމް މިނިސްޓަރު އިތުރަށް ވިދާޅުވި ގޮތުގައި، ރައްޔިތުން އިންތިޚާބު ކޮށްފައިވާ ސަރުކާރެއް ވައްޓާލަން ގޮވާލުމަކީ ރަނގަޅު ކަމެއްތޯ ނުވަތަ ނޫންތޯ ބަލަން އެ ސަރުކާރު އިންތިޚާބު ކުރި ރައްޔިތުން ބޭނުންވާނެއެވެ. މިފަދަ ތުހުމަތެއް ކުރެވިއްޖެނަމަ، ފުލުހުންގެ އިދާރާއިން ތަހުގީގު ކުރާނެ ކަމަށާއި، އެކަށީގެންވާ ތަހުގީގެއް ކޮށްގެން މެނުވީ މިކަމުގެ ޖަވާބު ނުދެވޭނެ ކަމަށް އޭނާ ފާހަގަކުރެއްވިއެވެ.

މި މައްސަލަ ތަހުގީގު ކުރަން ފެށުމާ ގުޅިގެން، އިދިކޮޅު ފަރާތްތަކުން ޕޮލިސް ކޮމިޝަނަރުގެ އިސްތިއުފާއަށް ގޮވާލަން ފަށާފައިވާ ކަމަށް ފާހަގަކުރައްވައި، މިފަދަ ކަންކަން ނުކުރުމަށް އިހުސާން އެދިވަޑައިގަތެވެ.

އަދި ދައުލަތާ ދެކޮޅު ކަމެއް ހިނގާ ކަމުގެ މަޢުލޫމާތު ލިބުމުން ފުލުހުން ތަހުގީގު ކުރާނެ ކަމަށާއި އެއީ ހާސްވާން ޖެހޭ ކަމެއް ނޫން ކަމަށްވެސް އިހުސާން ވިދާޅުވިއެވެ.

ޑޮލަރުގެ މައްސަލަ ދިމާވި ދުވަހު "ގިނަ އިއްތިފާގުތަކެއް އެއްފަހަރާ ހިނގި" ކަމަށް ފާހަގަކުރައްވައި، ބޭންކް އޮފް މޯލްޑިވްސްއިން ނިންމުމެއް ނިންމާފައިވަނީ އިތުރު ބޯޑު ބައްދަލުވުމެއް ބޭއްވުމަށް ގަޑިއިރުތަކެއް ކުރިން ކަމަށާއި، އެ ދަނޑިވަޅާ ދިމާކޮށް ޕެއިޑް ސާވިސްތަކާއި ސޯޝަލް މީޑިއާ ބޮޓްތަކަކުން މީހުން މަގުމައްޗަށް ނެރެން ގޮވާލި ކަމަށް އިހުސާން ވިދާޅުވިއެވެ. މީގެ އިތުރުން، ހަމަ އެވަގުތު ސިޔާސީ ޕާޓީއަކުން ވެސް ނޫސްވެރިންގެ ބައްދަލުވުމެއް ބޭއްވި ކަމަށް ފާހަގަކުރެއްވިއެވެ.

"އެއްފަހަރާ އެ ހުރިހާ އިއްތިފާގެއް ދިމާވުމުން ސުވާލު އުފެދޭ،" އިހުސާން ވިދާޅުވިއެވެ. މި ހުރިހާ ކަމެއް އެއްފަހަރާ ހިނގުމާ ގުޅިގެން، މައްސަލައިގެ ޙަޤީޤަތް ހޯދުމަށް ތަޙުޤީޤެއް ކުރިއަށް ގެންދިއުމަކީ މުހިންމު ކަމެއް ކަމަށް ހޯމް މިނިސްޓަރު ވިދާޅުވިއެވެ.