ސިނަމާލެ ބުރިޖު ނިންމަން ކަނޑައެޅި ތާރީޚުގެ ކުރިން، އެ ކަމަށް ކަނޑައެޅި ބަޖެޓަށްވުރެ އިތުރަށް ޚަރަދު ނުކޮށް މަސައްކަތް ނިންމައިލުމަކީ އޭރު ހައުސިން މިނިސްޓަރަކަށް ހުންނެވި މިހާރުގެ ރައީސް ޑރ. މުހައްމަދު މުއިއްޒުގެ ލީޑާޝިޕް ދައްކުވައިދޭ ހެއްކެއް ކަމަށް އިމާރާތް ކުރުމާއި ބިނާރާ ބެހޭ ވަޒީރު ޑރ. އަބްދުالله މުއްތަލިބް މިއަދު ވިދާޅުވެއްޖެއެވެ.
ސިނަމާލެ ބްރިޖު ހުޅުވުނުތާ 6 އަހަރު ފުރުން ފާހަގަކޮށް ވަޒީރު މުއްޠަލިބު އެކސްގައި ކުރެއްވި ޕޯސްޓެއް ވިދާޅުވީ، ވިދާޅުވީ ސިނަމާލެ ބްރިޖަކީ ރާއްޖޭގެ އިޤްތިޞާދީ ތަރައްޤީއަށް ބޮޑު ބަދަލެއް ގެނެސްދިން މަޝްރޫޢެއް ކަމަށެވެ.
އަދި މި މަޝްރޫޢު ކުރިއަށް ގެންދެވުނީ ޗައިނާގެ އެހީގައި ކަމަށާއި، މިއީ ރާއްޖޭގެ އުމްރާނީ ތަރައްޤީގެ އައު ދޮރެއް ހުޅުވާލި މަޝްރޫޢެއް ކަމަށްވެސް އޭނާ ވިދާޅުވިއެވެ.
މުއްޠަލިބު ވިދާޅުވި ގޮތުގައި ސިނަމާލެ ބްރިޖަކީ ރާއްޖެއާއި ޗައިނާއާ ދެމެދު އޮތް ގާތް ގުޅުމުގެ ދާއިމީ ނިޝާނެކެވެ. އަދި މި މަޝްރޫޢު ވަނީ ކަނޑައެޅުނު މުއްދަތަށްވުރެ ކުރިން އަދި ބަޖެޓަށްވުރެ ބޮޑުނުވެ ނިންމާލެވިފައި ކަމަށް އޭނާ ފާހަގަކުރެއްވިއެވެ.
"އެ މަޝްރޫއު ބަޖެޓުގެ ތެރެއިން، ނިންމަން ކަނޑައެޅި ތާރީޚުގެ ކުރިން ނިންމައިލުމަކީ އޭރުގެ ހައުސިން މިނިސްޓަރު، މިހާރުގެ ރައީސް ޑރ. މުއިއްޒުގެ ލީޑާޝިޕް ދައްކުވައިދޭ ހެއްކެއް،" ވަޒީރު މުއްޠަލިބު ވިދާޅުވިއެވެ.
2018 ވަނައަހަރުގެ އޮގަސްޓުމަހު 30 ވަނަ ދުވަހުގެރޭ ސިނަމާލެ ބްރިޖް ހުޅުވުމުގެ ރަސްމިއްޔާތު އޮތީ ހަވާ އަރުވައި ލޭޒަރ ލައިޓްގެ ކުލަގަދަ ހަރަކާތްތަކާއި އެކުއެވެ. ތިން އަހަރާއި 11 މަސްދުވަހުން ނިންމާލެވުނު މި ބުރިޖަކީ ރާއްޖޭގައި މިހާތަނަށް ހިންގި އުމްރާނީ ތަރަށްޤީގެ އެންމެ ބިޔަ އެއް މަޝްރޫއެވެ.
ސިނަމާލެ ބުރިޖުގެ މަސައްކަތަކީ ރައީސް ޔާމީންގެ ވެެރިކަމުގައި 210 މިލިއަން ޑޮލަރު ހަރަދުކޮށްގެން ހެދި ބުރިޖެކެވެ. އޭގެ ތެރެއިން 126 މިލިއަން ޑޮލަރަކި ޗައިނާ ސަރުކާރުގެ ހިލޭ އެހީއެވެ.
Advertisement
This content is created and paid for by advertisers and does not involve Voice Journalists
