އަލްޓްރާ-ވައިލެންޓް ޒެޓާސް އުފެއްދި މެކްސިކޯގެ ޑްރަގް ލޯޑް އެމެރިކާގެ ޖަލުން ދޫކޮށްލާފައިވާކަމަށް މީޑިއާރިޕޯޓުތަކުން ބުނެފިއެވެ

އޮސިއެލް ކާޑެނާސް އެމެރިކާޖަލުން ދޫކޮށްލާފައިވަނީ މިދިޔަ ހުކުރުދުވަހުގައެވެ.

ގަލްފް ކާޓެލްގެ ކުރީގެ ލީޑަރު ކާޑެނާސް އަކީ މެކްސިކޯގެ ހަލަބޮލި ދުވަސްވަރު ހިނގި އެންމެ ނުރައްކާތެރި ގޭންގް މާރާމާރީތަކުގެ  ބޮޑަކަށްހުރި މީހާއެވެ.

Advertisement

މަސްތުވާތަކެތީގެ ވަގުފާރި ކުރާކަމުގެ ތުހުމަތުވެސް އޭނާގެ ބޮލުގައިވަނީ އަޅުވާފައެވެ.

ކާޑެނާސް އުފެއްދި ޒެޓާސް އަކީ ކުރީގެ އަސްކަރިއްޔާގެ ސްޕެޝަލް ފޯސަސްގެ މައްޗަށް އެކުލެވިގެންވާ ގަލްފް ކާޓެލްގެ ހަތިޔާރު އެޅި ގޮފި ބައެކެވެ.

2003 ވަނަ އަހަރު ހިނގި ބަޑީގެ ހަމަލާތަކަށްފަހު އޭނާ ހައްޔަރުކުރުމަށްފަހު 2007 ވަނަ އަހަރު އެމެރިކާއަށް ފޮނުވާލާފައިވެއެވެ. އޭނާ 25 އަހަރަށް ޖަލަށް ލާން ހުކުމް 2010 ވަނަ އަހަރު ކިރިކަމަށް މީޑިއާ ރިޕޯޓުތަކުން ވަނީ ބުނެފައެވެ.

އެމެރިކާގެ ޕްރިޒަން ސާވިސްގެ ތަރުޖަމާނަކު ރޮއިޓާސްއަށް ވިދާޅުވީ ކާޑެނާސް ދޫކޮށްލީ އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމަންޓް (އައިސީއީ)ގެ ބެލުމުގެ ދަށަށް ކަމަށެވެ.

އޭގެ ފަހުން ޒެޓާސް އަމިއްލައަށް އުފެދުނު އިރު، މެކްސިކޯގެ އެންމެ ނުރައްކާތެރި ކުށުގެ ވެށީގައި ކުޑަ ދުވަސްކޮޅަކަށް ވެ، ޒެޓާސް އޮތްކަމަށްވެސް މީޑިޔާތަކުންވަނީ ބުނެފައެވެ.

ކާޑެނާސް މެކްސިކޯއަށް ފޮނުވާލާނެ ކަމެއް ނުވަތަ އެމެރިކާގެ ބަހައަޓާނީ ކަމެއް އަދި ސާފެއް ނުވެ އެވެ.

އެމެރިކާގެ ނަން ހާމަނުކުރާ އޮފިޝަލަކާ ހަވާލާދީ އެމެރިކާގެ ނިއުސް ނެޓްވޯކް އެންބީސީން ބުނީ ބައިޑަންގެ ސަރުކާރުން އަންނަ ހޯމަ ދުވަހު ކާޑެނާސް މެކްސިކޯއާ ހަވާލުކުރަން ނިންމާފައިވާ ކަމަށެވެ.

އައިސީއީގެ ތަރުޖަމާނު ވިދާޅުވީ، އޮންޑިއާނާގެ ޓެރޭ ހައުޓޭގައި ހުންނަ އައިސީއީގެ ބެލުމުގެ ދަށަށް ކާޑެނާސް ގެންގޮސްފައިވާކަމަށެވެ. އަދި އޭނާ ހުރީ އައިސީއީ އެންފޯސްމަންޓް އެންޑް ރިމޫވަލް އޮޕަރޭޝަންސް އޮފިސަރުން ގެ ބެލުމުގެ ދަށުގައި ކަމަށްވެސް ވަނީ ބުނެފައެވެ.

އޭނާ އަދި ހުރީ އައިސީއީގެ ބެލުމުގެ ދަށުގަ އެެވެ.