އަންހެނަކަށް ވަޅިން ބިރުދައްކައި ރަހީނުކުރި އާދަމް އަތުހަރު، ޝަރީއަތް ނިމެންދެން ބަނދުގައި ބެހެއްޓުމަށް ކްރިމިނަލް ކޯޓުން ހުކުމްކޮށްފިއެވެ.

އަތުހަރު ބަންދުގެ މުއްދަތު އިތުރުކުރުމަށް ފުލުހުން ކޯޓަށް ހުށަހެޅުމުން ކޯޓުން ވަނީ ޝަރީއަތް ނިމެންދެން އަތުހަރު ބަންދުގައި ބެހެއްޓުމަށް އަމުރުކޮށްފައެވެ. މިދިޔަ ބްރާސްފަތި ދުވަހުގެ ރޭ އަންހެނަކަށް ވަޅިން ބިރުދެއްކުމުގެ އެ ހާދިސާގައި އަތުހަރަށް ލިބުނު އަނިޔާތަކަށް ފަރުވާހޯދުމަށްފަހު އޭނާ މިހާރު ހުރީ ފުލުހުންގެ ބެލުމުގެ ދަށުގައެވެ.

ބްރާސްފަތި ދުވަހުގެ ރޭ ހިނގި ރަހީނުކުރުމުގެ ހާދިސާގައި އަތުހަރުގެ ލޯބިވެރިޔާކަމަށް ބުނާ އަންހެން މީހާއަށް ވަޅިން ބިރުދެއްކުމުގެ ކުރިން އެކި ފަހަރުމަތިން އަތުހަރު ވަނީ އޭނާއަށް އަނިޔާކޮށްފައެވެ. އޭގެ ފަހުން އަތުހަރު ވަނީ އަންހެންމީހާއަށް ވަޅިން ބިރުދެއްކުމަށްފަހު ސައިކަލުގައި އޭނާ ދާން ބޭނުންވާ ތަނަށް ދިއުމަށް މަސައްކަތްކޮށްފައެވެ. އޭރުވެސް ފުލުހުން ދިޔައީ އަންހެންމީހާ ސަލާމަތްކުރުމަށް އެކި ގޮތްގޮތުން މަސައްކަތްކުރަމުންނެވެ.

ނަމަވެސް، ވަކި ހިސާބަކުން ފުލުހުން ވަނީ ހުށިޔާރުކަމާއެކު އަންހެންމީހާ ސަލާމަތްކޮށްފައެވެ. މިކަމުގެ ތެރޭގައި ދެމީހުންނަށް އަނިޔާވެ ހޮސްޕިޓަލަށް ވަނީ ގެންގޮސްފައެވެ. ނަމަވެސް އަންހެންމީހާއަށް މާބޮޑު އަނިޔާތަކެއް ނުލިބެއެވެ. އަތުހަރަށް ލިބުނު އަނިޔާތަކާ ގުޅިގެން އެންމެފުރަތަމަ އޭނާއަށް ފަރުވާދީފައިވަނީ އޭޑީކޭއަށް ގެންގޮސްގެންނެވެ.

އެހެންނަމަވެސް، ހައްޔަރު ކޮށްފައި ހުއްޓާ އޭނާ ހޮޑުލާތީ ފަރުވާދިނުމަށް ފަހުން އައިޖީއެމްއެޗަށް ގެންދިޔައީއެވެ. މި ހާދިސާގައި އަންހެންމީހާ ރަހީނުކުރި އަތުހަރަކީ ކުށުގެ ރެކޯޑް އޮންނަ މީހެކެވެ. ޖަލުގައި ހުކުމް ތަންފީޒުކުރަމުން ދަނިކޮށް އަތުހަރު ސަލާމަތްވީ މިދިޔަ ސަރުކާރުގެ ދުވަސްވަރު އޭނާއަށް ރައީސް އަފްއާމް ދެއްވުމުންނެވެ.

އަތުހަރު އާއި އެ އަންހެންމީހާ ދިރިއުޅެމުން އައީ އެއް ގެއެއްގައެވެ. މިހާތަނަށް ލިބުނު މައުލޫމާތުތަކަށް ބަލާއިރު އެއީ ލޯބީގެ ގޮތުން ގުޅިގެން އުޅޭ ދެމީހުންނެވެ. ދެމީހުންގެ ދެމެދުގައި ހަމަނުޖެހުން ފެށުނީ ގޭގެ ކުލި ދެއްކުމުގައި އަތުހަރުގެ އެއްބާރުލުން ނުދޭތީއެވެ. އަތުހަރު ވަޒީފާއަކަށް ނުދާއިރު، ހުރިހާ ހަރަދެއް ކުރަން ޖެހެނީ އެ އަންހެންމީހާއަށްކަމަށް ވެއެވެ.