ބަންގްލަދޭޝްގައި ދިވެހި ދެ ޑޮކްޓަރަކަށް ހަމަލާދިނީ އެ ޑޮކްޓަރުންނަކީ ދިވެހީންނަށް ވެގެން ނޫން ކަމަށާއި، އެއީ އެވަގުތު ހިނގި މުޢާމަލާތްތަކެއްގައި އެރި އޮޅުމަކުންކަން ވޮއިސް އަށް ކަށަވަރު ވެއްޖެއެވެ. 

ބަންގްލަދޭޝްގެ ޗިޓަގޮންގް މެޑިކަލް ހޮސްޕިޓަލްގައި މަސައްކަތްކުރާ ދިވެހި އިންޓާން ޑޮކްޓަރުންނާ ހަވާލާދީ އެމައުލޫމާތު އެނގޭ ފަރާތަކުން ވޮއިސް އަށް މައުލޫމާތު ދިން ގޮތުގައި، އިއްޔެ ހަވީރު އެ ހޮސްޕިޓަލްގައި ދެ ދިވެހި އަންހެން ޑޮކްޓަރަކަށް ހަމަލާދިނީ އެމީހުންނަކީ ދިވެހީންނަށް ވެގެނެއް ނޫނެވެ. މި ހާދިސާ ހިނގާފައިވަނީ ހާޓް އެޓޭކެއް ޖެހިގެން މަރުވި ޕޭޝަންޓެއްގެ އާއިލާއިން، އެ ޕޭޝަންޓަށް ނުބައި އިންޖެކްޝަނެއް ދީގެން މަރާލީ ކަމަށް ހީކޮށް އެރި އޮޅުމަކުންނެވެ.

ނަމަވެސް، އެ ދެ ދިވެހި ޑޮކްޓަރުންގެ ޝިފްޓް ފެށުނު ފަހުން އެއްވެސް މެޑިކޭޝަނެއް އަދި އިންޖެކްޝަނެއްވެސް މަރުވި ޕޭޝަންޓަށް ދީފައި ނުވާކަމަށް ވޮއިސް އަށް މަޢުލޫމާތު ލިބިފައިވެއެވެ. މި ހާދިސާ ހިނގީ، މަރުވި މީހާގެ މަރުގެ ސެޓްފިކެޓް ތައްޔާރުކުރުމަށް އައިޑީ ކާޑު ނަގަން އާއިލާގެ ގާތަށް ދިޔަ ވަގުތުގައެވެ.

ދިވެހި އިންޓާން ޑޮކްޓަރުން ނެރުނު ބަޔާނެއްގައި ވެސް ބުނެފައިވަނީ، މި ހާދިސާއަކީ ރާއްޖޭގައި ގަވާއިދާ ޚިލާފަށް ދިރިއުޅެމުންދާ ބަންގްލަދޭޝް މީހުން ޑީޕޯޓުކުރުމާ އެއްވެސް ގުޅުމެއް އޮތް ކަމެއް ނޫން ކަމަށެވެ. އަދި މިއީ ދިވެހީންނަށް ވީތީ ދެވުނު ހަމަލާއެއް ނޫންކަމަށާއި، އެ ވަގުތު ބަންގްލަދޭޝްގެ ޑޮކްޓަރުން ޑިއުޓީގައި ތިބިނަމަ، އެމީހުންނަށްވެސް މިފަދަ ހަމަލާތައް އަމާޒުވާނެ ކަމަށެވެ.

އިންޓާން ޑޮކްޓަރުން އިލްތިމާސްކޮށްފައިވަނީ މި ހާދިސާ ސިޔާސީ ނުވަތަ ދެ ގައުމުގެ ޚާރިޖީ މައްސަލައެއްގެ ގޮތުގައި ސިފަނުކުރުމަށާއި، އެގޮތަށް ޚަބަރު ނުފެތުރުމަށެވެ. އަދި މިކަމާ ގުޅޭގޮތުން ހޮސްޕިޓަލްގެ ޑިރެކްޓަރާ ވާހަކަދައްކައި، ކުރިއަށް އޮތް ތަނުގައި ވޯޑުތަކުގެ ސެކިއުރިޓީ ބެލެހެއްޓުމުގެ އިންތިޒާމް ވަރުގަދަ ކުރާނެ ކަމުގެ ޔަގީންކަން ޑިރެކްޓަރު ދީފައިވާ ކަމަށްވެސް ބުނެފައިވެއެވެ.