ހުޅުމާލޭގައި ހިނގި ނުރައްކާތެރި ކާރު އެކްސިޑެންޓެއްގެ ޑްރައިވަރު އަލުން ހައްޔަރުކުރުމަށް ފުލުހުން މަސައްކަތް ކުރަމުންދާ ކަމަށް ހޯމް މިނިސްޓަރު އަލީ އިހުސާން ހާމަކުރައްވައިފިއެވެ.
މިދިޔަ ޖުލައި 31 ވަނަ ދުވަހު ހުޅުމާލޭ ދެވަނަ ފިޔަވަހީގެ ވިނަރެސް އެޕާޓްމެންޓުތައް ކައިރީގައި ހިނގި މި އެކްސިޑެންޓުގައި، ގަވާއިދާ ޚިލާފަށް ބާރު ސްޕީޑުގައި ދުއްވަމުން ދިޔަ ކާރެއް , މަގުގެ އެއްފަރާތެއްގައި މަޑުކޮށްލައިގެން ސައިކަލެއްގައި އިން މީހެއްގެ ގައިގައި ޖެހި ބޮޑެތި އަނިޔާތަކާ ކުރިމަތިވެފައެވެ.
އެކްސިޑެންޓްވި ކާރުގެ ޑްރައިވަރު އިބްރާހިމް އިކްރާމް، ޝަރީއަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން ނެރުނު އަމުރު ހައިކޯޓުގައި އިސްތިއުނާފު ކުރުމުން، އެ ކޯޓުން ވަނީ ދަށު ކޯޓުގެ އަމުރު ބާޠިލުކޮށްފައެވެ. އިކްރާމްގެ ފަރާތުން މައްސަލަ އިސްތިއުނާފު ކޮށްފައިވަނީ އޭނާގެ ބަންދުގެ މުއްދަތު ޖަހާފައިވަނީ ޤާނޫނީ ވަކީލެއް ނެތި ކަމަށް ބުނެއެވެ.
މި ހާދިސާއާ ގުޅިގެން ހޯމް މިނިސްޓަރު އަލީ އިހުސާން ވިދާޅުވެފައިވަނީ، މައްސަލަ ތަޙްޤީޤުކޮށް އިހުމާލުވެފައިވާ ފަރާތްތަކަށް އެންމެ ހަރުކަށި ފިޔަވަޅު އަޅާނެ ކަމަށެވެ. އަދި ދޫކޮށްލެވުނު ޑްރައިވަރު އަލުން ހައްޔަރުކުރުމަށް ކޯޓު އަމުރެއްގެ ދަށުން ފުލުހުން މަސައްކަތް ކުރަމުންދާ ކަމަށްވެސް އޭނާ ހާމަކުރެއްވިއެވެ.
މި އެކްސިޑެންޓުގެ ވީޑިއޯތަކެއް ސޯޝަލް މީޑިއާގައި ދައުރުވެފައިވާއިރު، އެ ވީޑިއޯތަކުން ފެންނަ ގޮތުގައި އެހެން މަގަކުން ނުކުމެގެން އައި ކާރެއް ކޮންޓްރޯލުން ނެއްޓި، ސައިކަލެއްގައި ޖެހުމުން ސައިކަލުގައި އިން މީހާ ވަނީ ވިއްސައިގެން ގޮސްފައެވެ.
Advertisement
This content is created and paid for by advertisers and does not involve Voice Journalists
