މާލޭގައި ގިނަ ދުވަސްތަކެއް ވަންދެން ހިންގަމުން އައި އޭ ލެވެލް ސްކޫލް، ސެންޓަރ ފޮރ ހަޔަރ ސެކަންޑަރީ އެޑިޔުކޭޝަން (ސީއެޗްއެސްއީ) އަލުން ހުޅުވައި، މިއަދު ކިޔަވައިދޭން ފަށައިފިއެވެ.

މާލެ ސަރަހައްދުގައި މަތީ ސާނަވީއަށް ކިޔަވައިދޭ ހަމައެކަނި ސަރުކާރު ސްކޫލުގެ ގޮތުގައި ކުރިން ހިންގަމުން އައި ސީއެޗްއެސްއީ، މިދިޔަ އޮގަސްޓް މަހު ހުޅުމާލެއަށް ބަދަލުކުރުމަށްފަހު، އަނެއްކާވެސް މާލޭގައި ހުޅުވުމަށް ނިންމާފައިވަނީ މާލޭގައި އޭ ލެވެލްއަށް ކިޔަވައިދޭ ސަރުކާރު ސްކޫލެއް ނެތުމުގެ ސަބަބުން ދަރިވަރުންނާއި ބެލެނިވެރިންނަށް ދިމާވި ދަތިތަކަށް ޙައްލެއް ހޯދުމަށެވެ.

އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވި ގޮތުގައި، މި ސްކޫލަކީ މާލޭގައި ހުންނަ މަތީ ސާނަވީއަށް ކިޔަވައިދޭ އެންމެ ފެންވަރު ރަނގަޅު، އަދި ދަރިވަރުންނަށް އުފާވެރި އުނގެނުމުގެ މާޙައުލެއް ޤާއިމުކޮށްދޭ ތަނަކަށް ހެދުމަށް މަސައްކަތްކުރާނެއެވެ. އަދި މިކަމުގެ ސަބަބުން މާލެ އާއި ހުޅުމާލެއާ ދެމެދު ދަތުރުކުރާ ދަރިވަރުންގެ އަދަދު މަދުވާނެ ކަމަށްވެސް އެމަނިކުފާނު ވިދާޅުވިއެވެ.

Advertisement

ސްކޫލު އަލުން ހުޅުވައި ކިޔަވައިދޭން ފަށާފައިވަނީ 400 އަށްވުރެ ގިނަ ދަރިވަރުނާ އެކުގައެވެ. އަދި އިތުރު ދަރިވަރުން ވަނުމަށް އެދެމުންދާ ކަމަށްވެސް މިނިސްޓަރު ފާހަގަކުރެއްވިއެވެ.

މި ސްކޫލުގެ ޕްރިންސިޕަލްގެ މަޤާމަށް ހަމަޖައްސާފައިވަނީ ދަރުމަވަންތަ ސްކޫލުގައި 17 އަހަރު ވަންދެން ޕްރިންސިޕަލްކަން ކުރެއްވި އަބްދުﷲ ދީދީއެވެ.

މާލޭގައި މި ސްކޫލު އަލުން ހުޅުވި ނަމަވެސް، ހުޅުމާލޭގައިވެސް އޭ ލެވެލްއަށް ކިޔަވައިދިނުން ކުރިއަށް ގެންދިޔުމަށް އެޑިޔުކޭޝަން މިނިސްޓްރީން ވަނީ ނިންމާފައެވެ.