މިދިޔަ ޖުލައި މަހުގެ 31 ވަނަ ދުވަހު ހުޅުމާލޭ 2 ގައި ހިނގި ނުރައްކާތެރި އެކްސިޑެންޓާ ގުޅިގެން ހައްޔަރުކުރެވުނު ކާރު ދުއްވި ފަރާތް، އިބްރާހިމް އިކްރާމް، ކޯޓު އަމުރެއްގެ ދަށުން އަނެއްކާވެސް ބަންދު ކޮށްފިއެވެ.
މި އެކްސިޑެންޓާއި ގުޅިގެން އިކްރާމް، ޝަރީޢަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފައިވަނިކޮށް، އެ އަމުރު ކުރީ އޭނާއަށް ވަކީލެއްގެ އެހީތެރިކަން ނުލިބޭ ގޮތަށް ކަމަށް ބުނެ ހައިކޯޓުން ވަނީ އެ އަމުރު ބާތިލް ކޮށްފައެވެ.
އެއާއެކު އިކްރާމް މިނިވަންވެފައިވާއިރު، އެކަމާއި ގުޅިގެން ހޯމް މިނިސްޓަރު ޢަލީ އިޙްސާން ރޭ އެކްސްގައި ކުރެއްވި ޕޯސްޓެއްގައި ވަނީ އެކަން ހިނގިގޮގް ތަހުގީގުކޮށް އިހްމާލެއް ވެފައިވާ ނަމަ އެމީހަކަށް ނުވަތަ ބަޔަކަށް ހަރުކަށި ފިޔަވަޅު އެޅޭނެ ކަމަށް ވިދާޅުވެފައެވެ.
އަދި ދޫކޮށްލި މީހާ ކޯޓު އަމުރެއްގެ ދަށުން ބަންދު ކުރުމަށް މަސައްކަތް ކުރައްވަމުންދާ ކަމަށްވެސް މިނިސްޓަރ ރޭ ވިދާޅުވެފައި ވާއިރު، ފަހުން ކުރެއްވި ޕޯސްޓެއްގައި ވަނީ ކޯޓު އަމުރެއްގެ ދަށުން އޭނާ އަލުން ހައްޔަރު ކުރެވިފައުވާ ކަމަށް ވިދާޅުވެފައެވެ.
މި އެކްސިޑެންޓު ހިނގީ ވިނަރެސް ފްލެޓްތަކުގެ މެދަށް އޮންނަ މަގުން ބާރު ސްޕީޑުގައި ދުއްވި ކާރެއް ކޮންޓްރޯލުން ނެއްޓި، މަގުގެ އެއްފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހިގެންނެވެ. އެކްސިޑެންޓަށްފަހު އިކްރާމާއި ކާރުގައި ތިބި އިތުރު ދެ މީހުން ވަނީ ފިލާފައެވެ. ނަމަވެސް އިކްރާމް އެރޭ ހައްޔަރުކުރެވުނެވެ.
އަދި ކާރުގައި އިން އަނެއް މީހާ، އިކްރާމުއްރަޙްމާނާއި ޖިނާޙް އިސްމާޢީލް ވެސް ވަނީ ފަހުން ހައްޔަރުކޮށްފައެވެ.
ފާހަގަކޮށްލެވޭ ކަމަކީ، އެކްސިޑެންޓްވި ކާރަކީ މާލެ ޒޯންގައި ދުއްވަން ރަޖިސްޓްރީކޮށްފައިވާ އުޅަނދެއް ނޫންކަމެވެ. ކާރުގެ ނަންބަރު ޕްލޭޓްގައި އޮތީ ރާއްޖޭގެ އުތުރާއި ދެކުނުގެ އަތޮޅުތަކުގައި ދުއްވަން ރަޖިސްޓްރީކޮށްފައިވާ "ބީ ޒޯން" ގެ ނަންބަރެކެވެ.
Advertisement
This content is created and paid for by advertisers and does not involve Voice Journalists
