ޔޫކްރެއިންއިން ރަޝިޔާގެ މޮސްކޯގެ ތެޔޮ ސާފުކުރާ ބޮޑު ފެކްޓްރީއަކަށް ހަމަލާދީފައިވާކަމަށް މީޑިއާތަކުން ބުނެފިއެވެ.

ރަޝިޔާގެ ދިފާޢީ ވުޒާރާ ބުނާގޮތުން އެ ގައުމުގެ 15 ސަރަޙައްދެއްގައި ހުރި ތެލުގެ މަރުކަޒުތަކާއި އިންޖީނުގެތަކަށް ހަމަލާދިނުމަށް ޔުކްރެއިނުން 158 ޑްރޯން ފޮނުވާލި ކަމަށާއި އޭގެ ތެރެއިން 150 ޑްރޯން ވައްޓާލާފައިވާނެ ކަމަށްށެވެ.

އޭގެ ތެރެއިން އެ ޑްރޯން ގޮއްވާލާފައިވަނީ ދައުލަތުގެ ހަކަތަ އުފައްދާ ކުންފުންޏެއް ކަމަށްވާ ގަޒްޕްރޮމްގެ ހިއްސާ އޮންނަ މޮސްކޯގެ ބޮޑު ރިފައިނަރީއެއްގެ މަތީގައި ކަމަށާއި އަނެއް ޑްރޯން ގޮއްވާލާފައިވަނީ ޓްވާ ސަރަހައްދުގެ އިންޖީނުގެއަކަށް ކަމަށް އޮފިޝަލުން ވަނީބުނެފައެވެ.

ރަޝިއާގެ މަޝްހޫރު ޓީވީ ނެޓްވާކު "އާރުޓީ" ބުނާގޮތުން ޔުކްރެއިނުން އެއްފަހަރާ ގިނަ ޢަދަދެއްގެ ޑްރޯންތަކެއް ބޭނުންކޮށްގެން ހަމަލާދިނީ ރަޝިއާގެ ދިފާއީ ނިޒާމުތަކަށް ލޮޅުން އަރުވާލުމުގެ ބޭނުމިގައިކަމަށެވެ.

އަދި އޭގެ ތެރެއިން ގިނަ އަދަދެއްގެ ޑްރޯން ވެރިރަށް މޮސްކޯގެ ސަރަހައްދަށް ފޮނުވާލީ ރަޝިއާގެ ވައިގެ ދަތުރުފަތުރުގެ ނިޒާމު ހުއްޓުވާލުމުގެ ބޭނުމުގައި ކަމަށްވެސް އާރުޓީ އިންވަނީ ބުނެފައެވެ.

މޮސްކޯގެ މޭޔަރު ސަރްގެއި ސޮބްޔާނިން ވިދާޅުވީ މޮސްކޯގެ ރިފައިނަރީއަށް ގޮއްވާލި ޑްރޯންގެ ސަބަބުން ޕްލާންޓާ ޖެހިގެން ހުރި ޓެކްނިކަލް ފެސިލިޓީއަކަށް ގެއްލުން ލިބިފައިވާ ކަމަށެވެ. އަދި އިމަޖެންސީ ސާވިސަސްއިން އަލިފާން ނިއްވާލާފައިވާ ކަމަށްވެސް ވަނީ ބުނެފައެވެ.

އަދި މި ހާދިސާގައި އެއްވެސް މީހަކަށް ގެއްލުމެއް ލިބިފައި ނުވާ ކަމަށާއި ޕްލާންޓްގެ މަސައްކަތަށް އެއްވެސް އަސަރެއް ކޮށްފައި ނުވާ ކަމަށް އޭނާ ވަނީ ވިދާޅުވި އެވެ.

ނަމަވެސް އަދި މި ހާދިސާއާގުޅިގެން ކިއޭވް އިން އެއްވެސް އެއްޗެއްބުނެފައި ނަވާކަމަށް މީޑިއާތަކުންވަނީ ބުނެފައެވެ.