ފިލިޕީންސްގައި އުފެދިފައިވާ ބާރުގަދަ ތޫފާނެއްގައި ފެންބޮޑުވެ ބިންގަނޑު ކަނޑައިގެން ދިއުމުގެ ސަބަބުން 11 މީހުން މަރުވެއެފައިވާ ކަމަށް ބޭރުގެ މީޑިއާތަކުން ބުނެފިއެވެ.

ހޯމަ ދުވަހުގެ ރޭގަނޑުގެ ވަގުތެއްގައި އެރި ޓްރޮޕިކަލް ތޫފާން ޔާގީ އަރާފައިވަނީ އެގައުމުގެ އުތުރށެވެ. މި ތޫފާނުގެ ސަބަބުން ބޯކޮށް ވާރޭ ވެހުމުގެ ސަބަބުން ގިނަ ސަރަހައްދުތަކެއްގައި ފެންބޮޑުވެ ބިންގަނޑު ކަނޑައިގެން ދިއުމުގެ ހާދިސާތައް ހިންގަމުންދާކަމަށްވެސް މީޑިއާތަކުން ވަނީ ބުނެފައެވެ.

އަދި މީގެ އިތުނުން ރައްކާތެރިކަމުގެ ފިޔަވަޅެއްގެ ގޮތުން މެނީލާގެ ސްކޫލްތަކާއި ސަރުކާރު އޮފީސްތައް ބަންދުކޮށްފައިވާއިރު، ގެއްލުން ލިބުނު ސަރަހައްދުތަކުގައި ފެރީގެ ހިދުމަތް މެދުކަނޑާލައި އެތެރޭގެ 29 ފްލައިޓެއް ވަނީ ކެންސަލްކޮށްފަ އެވެ.

ސިޓީގެ އިންފޮމޭޝަން އޮފިސަރަކު އޭއެފްޕީ ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ އެންޓިޕޯލޯގެ މެނީލާ އަވަށުގައި ބިންގަނޑު ކަނޑައިގެން ދިއުމުގެ ސަބަބުން މާބަނޑު އަންހެނަކާއެކު ތިން މީހަކު މަރުވެފައިވާ ކަމަށެވެ.

އަދި ގެނބިގެން މަރުވި އިތުރު ހަތަރު މީހެއްގެ ހަށިގަނޑު ވެސް ހޯމަ ދުވަހު ވަނީ ފެނިފައިވާކަމަށް ވަނީ ބުނެފައެވެ.

އިރުމަތީގެ ސިޓީއެއް ކަމަށްވާ ނާގާއަށް ޔާގީ ތޫފާނުގެ އަސަރުކޮށް ފެންބޮޑުވެ ގެނބިގެން ކުޑަ އަންހެން ކުއްޖަކާއި އިތުރު ދެ މީހަކު މަރުވެފައިވާ ކަމަށް ވެސް ވަނީ ބުނެފައެވެ.

ކޮންމެ އަހަރަކު ވެސް ޖޫން މަހުގެ ފަހުކޮޅުން ފެށިގެން އޮކްޓޯބަރު މަހުގެ ނިޔަލަށް ފިލިޕީންސްއާއި އެ ސަރަހައްދުގެ ވަށައިގެންވާ ކަނޑުގެ ސަރަހައްދަށް 20 ވަރަކަށް ބޮޑު ތޫފާންތައް އަރައި ގެތަކަށާއި އުމްރާނީ ވަސީލަތްތަކަށް ގެއްލުންލިބި އެތައް ބަޔަކު މަރުވެއެވެ.