އަނިޔާއިން އެއްކިބާވެފައިވާ މާޙައުލެއްގައި ކުއްޖާ ހެދިބޮޑުވުމުގެ ފުރުސަތު ސަރުކާރުން ކަށަވަރުކޮށްދެއްވާނެކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.
ކުޑަކުދިންގެ ހައްޤުތަކާއި ރައްކާތެރިކަމާއި ގުޅޭ ޤައުމީ ޕްލޭން އިފްތިތާހުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވީ، ކުޑަކުދިންނަކީ ގައުމުގެ މުސްތަގުބަލު ކަމަށެވެ. އަދި އެކުދިންނަށް ރައްކާތެރި މާހައުލެއް ޤާއިމުކުރުމަކީ ސަރުކާރުގެ ޒިންމާއެއް ކަމަށެވެ.
“ސަރުކާރުގެ މެނިފެސްޓޯ އާއި އެއްގޮތަށް ތަންފީޒު ކުރެވެމުންދާ ”ކޮންމެ ކުއްޖަކަށް އާއިލާއެއް"މި ޝިއާރުގެ ދަށުން ދައްކުވައިދެނީ ކޮންމެ ކުއްޖަކަށްވެސް ލޯބިވާ އަޅާލާ ޢާއިލީ މާހައުލެއް ހޯދައިދިނުމަށް އަޅުގަނޑުމެން ސާބިތުކަމާއެކު ދެމިތިބޭނެކަން. ނަމަވެސް ހަމައެކަނި ލަފުޒުތަކުން ނުފުދޭ. ކުޑަކުދިންނަށް ކުރާ އަނިޔާއާއި ގޯނާގެ މައްސަލަތަކުގައި ވަގުތުން ފިޔަވަޅު އަޅަންޖެހޭނެ" ސާޖިދާ ވިދާޅުވިއެވެ.
އެގޮތުން، ކުޑަކުދިންނަށް ކުރާ އަނިޔާހުއްޓުވުމާއި، އެކަމަށް އިޖާބަދިނުމާ ބެހޭ ޤައުމީ އެކްޝަން ޕްލޭން އިފްތިތާޙްކުރުމާއެކު، ކުޑަކުދިންނަށް ކުރާ އަނިޔާއާއި ގުޅޭ ގިނަ މައްސަލަތަކެއް ހައްލުވެގެންދާނެކަމަށް މެޑަމް ސާޖިދާ ވަނީ ވިދާޅުވެފައެވެ.
މި ޕްލޭނަކީ ހަމައެކަނި ޕޮލިސީއެއް ނޫން. މިއީ ކުޑަކުދިންނަށް ކުރާ އަނިޔާހުއްޓުވައި، އެކުދިން ހިމާޔަތްކޮށް، އެކަމަށް އިޖާބަ ދޭނެ ގޮތްތައް ބަޔާންކުރާ، ވަރަށް ފުރިހަމަ ސާފު މަގުޗާޓެއް. އަޅުގަނޑުމެންގެ ތަޞައްވުރު ވަރަށް ސާފު، ކުޑަކުއްޖަކު އަނިޔާއިން އެއްކިބާވެފައިވާ މާޙައުލެއްގައި ހެދިބޮޑުވުމުގެ ފުރުސަތު ފަހިކޮށް، ޒިންމާދާރު ހަރުދަނާ ފަރުދަކަށް ހަދަންޖެހޭނެ. މި ތަޞައްވުރު ގެނައުމަށްޓަކައި އެންމެން ގުޅިގެން އެއްބައިވަންތަކަމާއެކު މަސައްކަތްކުރަންޖެހޭ. އަދި މިކަމަށް ހޭލުންތެރިކަން އިތުރުކުރަން ޖެހޭ"
ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު
ސާޖިދާ ވިދާޅުވީ އެހެންމީހުންގެ ފަރާތުން އަނިޔާ ލިބުފައިވާ މީހުންނަށް ބޭނުންވަނީ ހަމައެކަނި ރައްކާތެރިކަން ނޫން ކަމަށެވެ. އެހެނެއްކަމަކު، އެ އަނިޔާގެ ސަބަބުން އެމީހުންނަށް ލިބިފައިވާ ޝޮކުން އަރައިގަތުމަށް އެހެން މީހުންގެ އަޅާލުމާއި އެއްބާރުލުން ބޭނުންވާކަން އެކަމަނާ ފާހަގަކުރެއްވިއެވެ.
”މި އެކްޝަންޕްލޭނާއެކު އަޅުގަނޑުމެން މި ޔަގީންކޮށްދެނީ, ކުޑަކުދިންގެ ރައްކާތެރިކަމާއި، ދުޅަހެޔޮކަމާއި އަދި މުސްތަގުބަލަކީ ސަރުކާރުން އެންމެ އިސްކަންދޭ ކަންތައް ކަން. “ ސާޖިދާ ވިދާޅުވިއެވެ.
މިއާއެކު ސާޖިދާ ވިދާޅުވީ ކުޑަކުދިންނަށް ލިބޭ އަނިޔާއިން ސަލަމާތް ކުރުމަކީ ހަމައެކަނި އެކަކުގެ ޒިންމާއެއް ނޫން ކަމަށާއި އެންމެން އެކުގައި މަސައްކަތްކޮށްގެން އެ މަޤްސަދު ހާސިލްކުރެއްވޭނެ ކަމަށެވެ.
Advertisement
This content is created and paid for by advertisers and does not involve Voice Journalists
