ރަޝިޔާ އާއި ބެލަރޫސްގެ އެކިއެކި ދާއިރާތަކަށް އަމާޒުކޮށްގެން 'ހެޑް މެއަރ' ނަމަކަށް ކިޔާ ހެކަރުންގެ ޖަމާޢަތަކުން ސައިބަރ ހަމަލާތަކެއް ދޭން ފަށައިފިއެވެ.

މި ޖަމާޢަތުން މިހާތަނަށް 9 ތަނަކަށް ހަމަލާދީފައިވާ ކަމަށް ބެލެވެއެވެ. މީގެ ތެރޭގައި ސަރުކާރުގެ އިދާރާތަކާއި، ހަކަތައިގެ ދާއިރާއާއި، ދަތުރުފަތުރުގެ ދާއިރާއާއި، އުފެއްދުންތެރިކަމުގެ ދާއިރާ އަދި މުނިފޫހިފިލުވުމުގެ ދާއިރާގެ ތަންތަން ހިމެނެއެވެ.

މި ހަމަލާތަކުގައި ހެކަރުން ބޭނުންކޮށްފައިވަނީ ވިންރާރު (WinRAR) ސޮފްޓްވެއަރގައި ހުރި ސެކިއުރިޓީ މައްސަލައެކެވެ. މި މައްސަލައަކީ CVE-2023-38831 ގެ ނަމުން މަޝްހޫރު، އާރޝިފް ކުރެވިފައިވާ ފައިލްތަކުގައި މެލްވެއަރ ފޮރުވުމަށް ބޭނުންކުރެވޭ ކަމެކެވެ.

ހެކަރުން އެމީހުންގެ ހަމަލާތަކުގައި ބޭނުންކުރަނީ 'ފެންޓަމްކޯ' އަދި 'ފެންޓަމްޑީއެލް' ނަމަކަށް ކިޔާ ޚާއްޞަ މެލްވެއަރއެކެވެ. މި މެލްވެއަރ މެދުވެރިކޮށް ޓާގެޓް ކުރެވޭ ޖަމާޢަތްތަކުގެ ޑިވައިސްތަކަށް ވަދެ، 'ލޮކްބިޓް' ނުވަތަ 'ބަބުކް' ބޭނުންކޮށްގެން އެ ޑިވައިސްތައް އެންކްރިޕްޓް ކުރެއެވެ. އަދި މި ޑޭޓާ ޑީކްރިޕްޓް ކުރުމަށް އެދެއެވެ.

މި ހަމަލާތަކުގެ މަޤްޞަދަކީ ގެއްލުން ދިނުން ކަމަށް ބެލެވުނު ނަމަވެސް، ފައިސާ ހޯދުމަށް ވެސް މަސައްކަތް ކުރާކަން ފާހަގަކުރެވެއެވެ. ހެކަރުން ވަނީ ހޯދާފައިވާ މަޢުލޫމާތުތައް އެކްސް މެދުވެރިކޮށް ހާމަކޮށްފައެވެ. މީގެ ތެރޭގައި ޖަމާޢަތްތަކުގެ ނަންތަކާއި، އިދާރީ ކޯޑުތަކާއި އަދި ކޮމްޕިއުޓަރ ޑެސްކްޓޮޕްގެ ސްކްރީންޝޮޓްތައް ހިމެނެއެވެ.

މި ހަމަލާތައް އަންނަނީ ރަޝިޔާ-ޔުކްރެއިން ހަނގުރާމައިގެ ތެރެއިން އުފެދިފައިވާ ގިނަ ސައިބަރ ހަމަލާތަކުގެ ތެރެއިންނެވެ. ޔުކްރެއިންއަށް އެހީތެރިވާ ޤައުމުތަކާއި ޔުކްރެއިންގެ އަމާޒުތަކަށް ރަޝިޔާގެ ފަރާތުން ވެސް މިފަދަ ހަމަލާތައް ދެމުންދާކަމަށް ޓެކް ރިޕޯޓްތައް ބުނެއެވެ.