ނައިޖީރިއާގެ ބައެއް އަވަށްތަކަށް ބޯކޯ ހަރާމްގެ ހަނގުރާމަވެރިންގެ  ބަޔަކު އަރައި 81 މީހަކު މަރާލައިފި އެވެ.

ޔޯބޭ ސްޓޭޓްގެ ފުލުހުންގެ ތަރުޖަމާނަކު ވިދާޅުވީ ބޯކޯ ހަރާމްގެ ޓެރަރިސްޓުން ކަމަށް ބެލެވޭ 150 މީހަކު ސައިކަލްތަކެއްގައި ރައިފަލުގެ އިތުރުން އާރްޕީޖީ ބަޑި ހިފައިގެން މާފާ އަވަށަށް އަރައި ހަމަލާދީފައިވާކަމަށެވެ. ހަމަލާތައްދޭން ފެށީ ހަވީރު 4:00 ހާއިރުކަމަށާއި، ބޯކޯ ހަރާމްގެ ހަނގުރާމަވެރިން ފައިބައިގެން ދިޔައީ މުޅި ސަރަހައްދު ސުންނާފަތިކޮށްލުމަށްފަހުގައިކަމަށެވެ.

ގިނަ ބަޔަކު މަރާފައި ފިހާރަތަކުގައި ވެސް ހުޅުޖެހިކަމަށާއި މަރުވި މީހުންގެ އަދަދު އަދިވެސް ކަށަވަރު ނުވާތީ އެ އަދަދު ދާނީ އިތުރުވަމުން ކަމަށްވެސް އޭނާ ފާހަގަކުރިއެވެ.

ނައިޖީރިއާގެ އިރުއުތުރުގައި ބޯކޯ ހަރާމާއި ހަނގުރާމަވެރި އެހެން ޖަމާއަތްތަކުން 15 އަހަރު ކުރިން ފެށިގެން ހިންގަމުން އަންނަ މިފަދަ ހަމަލާތަކުގައި މިހާތަނަށް 40،000 އަށް ވުރެ ގިނަ މީހުން މަރުވެފައިވާކަމަށް މީޑިއާގެ ރިޕޯޓްތައް ބުނެއެވެ.

ބޯކޯ ހަރާމުން ހިންގަމުންދާ ޖަރީމާތައް އާއްމުގޮތެއްގައި އަމާޒުކުރަނީ އަންހެން ކުދިންނަށެވެ. ބޮޑެތިވަމުން އަންނަ އަންހެންކުދިން ވަގަށް ނަގައި ގެއްލުވާލުމުގެ އެތައް ކަމެއް ބޯކޯ ހަރާމުން ހިންގާފައިވާއިރު، އެ ޖަމާއަތަކީ ޓެރަރިސްޓް ޖަމާއަތެއްކަމަށް އެމެރިކާއިން ވަނީ ކަނޑައަޅާފައެވެ.