ޤައުމީ ދުވަހުގެ ޖަލްސާއަށް ވަޑައިގެންނެވި ފިރިހެން ބޭފުޅުން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދާ ސަލާމް ނުކުރައްވައި ވަޑައިގަތުމުން ކުރީގެ ރައީސް މައުމޫން ކަންބޮޑުވުން ފާޅުކުރައްވައިފިއެވެ.
މިކަމާއި ގުޅޭގޮތުން ރައީސް މައުމޫން އެކްސްގައި ކުރެއްވި ޕޯސްޓެއްގައި ވިދާޅުވީ، ޖަލްސާއަށް ވަޑައިގެންނެވި ފިރިހެން ބޭފުޅުން ރައީސުލްޖުމްހޫރިއްޔާގެ އަނބިކަނބަލުންނާ ސަލާމް ނުކުރެއްވިތަން ފެނުމުން ވަރަށް ދެރަވިކަމަށެވެ. މައުމޫން ވިދާޅުވީ ޤައުމީ ދުވަހުގެ ރަސްމީ ޖަލްސާގައި ދިވެހި ވަންތަކަމަށްޓަކާ ފަޚުރުވެރިވާން ޖެހޭ ވަރަށް ގިނަ ކަންތައްތަކެއް ފެނުމުން ވަރަށްއުފާވި ކަމަށެވެ.
ރާއްޖޭގައި ތިރީސް އަހަރު ވެރިކަންކުރެއްވި ރައީސް މައުމޫނު ފާހަގަކުރެވިފައިވަނީ، ދީނީ ކަންކަމުގައި ގިނަޢިލްމުވެރިންނާ ރަޢުޔު ތަފާތުވާ ބޭފުޅެއްގެ ގޮތުގައެވެ. އެގޮތުން ޔޯގާ މައްސަލާގައި ރާއްޖޭގެ 100 އަށްވުރެ ގިނަ ޢިލްމުވެރިން އެއްގަލަކަށް އެރި އިރުވެސް މައުމޫން ވިދާޅުވަމުން ދިޔައީ ޔޯގާ ހުއްދަ ކަމަށެވެ. އަދި ބުރުގާ އެޅުމުގެ މައްސަލާގައި މައުމޫން ވިދާޅުވި ވާހަކަތަކަށްވެސް އިލްމުވެރިންގެ އިތުރުން ދީނަށް ލޯބިކުރާ ގިނަ ބައެއްގެ ނުރުހުން އެމަނިކުފާނަށް އަމާޒުވިއެވެ.
އިސްލާމްދީނުގައި، ހިލޭ އަންހެނުންނާއި ހިލޭ ފިރިހެނުން އަތާ އަތް ޖޯޑުކޮށް ސަލާމް ކުރުމަކީ ހުއްދަ ކަމެއް ނޫން ކަމަށް އިލްމުވެރިން އިއްތިފާގުވެވަޑައިގަންނަވައެވެ.
Advertisement
This content is created and paid for by advertisers and does not involve Voice Journalists
