މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން ރާއްޖޭގައި ފުރަތަމަ ފަހަރަށް ބްރޯޑްކާސްޓް އޯޑިއަންސް ސާވޭއެއް ހެދުމުގެ މަސައްކަތް ފަށައިފިއެވެ.
މި ސާވޭގެ މަސައްކަތް ކުރިއަށް ގެންދަނީ ވިލާ ކޮލެޖުގެ އިންސްޓިޓިއުޓް ފޯ ރިސާޗް އެންޑް އިނޮވޭޝަނާ ގުޅިގެންނެވެ.
ބްރޯޑްކޮމްއިން މަޢުލޫމާތު ދެއްވާފައިވާ ގޮތުގައި، މި ސާވޭގެ މަޤްޞަދަކީ 'ޗެނަލް ރޭޓިން ލިސްޓު' އެކުލަވާލުމަށް ބޭނުންވާ މުހިންމު މަޢުލޫމާތު އެއްކުރުމެވެ. މި ސާވޭގެ ދަށުން ވިއުއަޝިޕާއި އޯޑިއަންސް ޝައުޤުވެރިވާ ޗެނަލްތަކާއި ކޮންޓެންޓުތައް ދެނެގަނެވޭނެ ކަމަށް ބްރޯޑްކޮމްއިން ބުނެފައިވެއެވެ.
ބްރޯޑްކޮމްގެ ރައީސް މަރިޔަމް ވަހީދާ ވިދާޅުވެފައިވަނީ މިއީ ތާރީޚީ ސާވޭއެއް ކަމަށެވެ. މި ސާވޭގެ ސަބަބުން ޓީވީ ޗެނަލްތަކުގެ ޕްރޮގްރާމްތައް އެ ޕްރޮގްރާމްތަކުގެ ސްޓޭންޑަޑަށް ބައްޓަންކުރަންވީ ގޮތްފަދަ މުހިންމު ކަންކަން އެނގޭނެ ކަމަށާއި، ރޭޑިއޯ އަޑުއަހާ މިންވަރު ދެނެގަނެވި، އެ މަޢުލޫމާތު ބްރޯޑްކާސްޓިންގ ދާއިރާގައި ބޭނުންކުރެވޭނެ ކަމަށް އޭނާ ވިދާޅުވިއެވެ.
"މި ސާވޭގެ ތެރެއިން ނުކުންނާނީ ރައްޔިތުންގެ އަޑު. އެ އަޑު އިވުނީމަ އިނގޭނެ މިހާރުގެ ޓެލެވިޜަން އޯޑިއަންސް އަސްލު އޮތީ ކިހިނެތްކަން. ކޯއްޗެއްކަން ބަލާހިތްވަނީ، އަދި އެއީ ސިޔާސީވިޔަސް އިޖުތިމާޢީ ޕްރޮގްރާމެއް ވިއަސް،"
މަރިޔަމް ވަހީދާ ވިދާޅުވިއެވެ.
މި ސާވޭ ކުރިއަށްދާނީ 10 ހަފުތާގެ މުއްދަތަށެވެ. އަދި ސާވޭގެ މަސައްކަތް ކުރާނީ ދާއިރާގެ ޕްރޮފެޝަނަލް ސާވޭ ގްރޫޕަކާއެކު ކަމަށާއި، މިހާރު ވަނީ ސާވޭ ކުރާނެ ފަރާތެއް އައުޓްސޯސްކޮށްފައި ކަމަށް ބްރޯޑްކޮމްގެ ރައީސް ވިދާޅުވިއެވެ. އަދި މި ސާވޭއަކީ ވަރަށް މިނިވަންކަމާއެކު ކުރެވޭނެ ސާވޭއެއް ކަމަށްވެސް އޭނާ ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
