ޓެކްނޮލޮޖީގެ ދާއިރާއިން އެއްބާރުލުން ދިނުމަށް ދިވެހިރާއްޖެއާއި ކަޒަކިސްތާނާ ދެމެދު އެއްބަސްވުމެއްގައި މިއަދު ސޮއިކޮށްފިއެވެ.

މި އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ ހޯމް މިނިސްޓްރީގެ ސްޓޭޓް މިނިސްޓަރު ޑރ. މުޙައްމަދު ކިނާނަތެވެ. ކަޒަކިސްތާނުގެ ފަރާތުން ސޮއިކުރެއްވީ އެ ޤައުމުގެ މިނިސްޓަރ އޮފް ޑިޖިޓަލް ޑިވެލޮޕްމަންޓް، އިނޮވޭޝަން އެންޑް އެރޯސްޕޭސް އިންޑަސްޓްރީ، ޒަސްލާން މަޑިޔެވްއެވެ.

މި އެއްބަސްވުމުގެ ތަފްސީލު މިވަގުތު ހާމަކޮށްފައި ނުވިނަމަވެސް، މި އެއްބަސްވުމަކީ ދެ ޤައުމުގެ ދެމެދުގައި ޓެކްނޮލޮޖީގެ ދާއިރާއިން އެއްބާރުލުން އިތުރުކުރުމަށް މަގުފަހިކޮށްދޭނެ އެއްބަސްވުމެއް ކަމަށް ބެލެވެއެވެ.

Advertisement

ކަޒަކިސްތާނާއެކު މި އެއްބަސްވުމުގައި ސޮއިކޮށްފައިވާއިރު، ދާދިފަހުން ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެފައިވަނީ ރޭވިގެން ހިންގާ ބޮޑެތި ކުށްތައް ތަޙުޤީޤުކުރުމުގައި ފުލުހުން މިހާރަށްވުރެ ކުޅަދާނަވާން، އޭއައި ބޭނުންކުރުމުގެ ޤާބިލުކަން ފުލުހުންގެ ކިބައިގައި ހުންނަންޖެހޭ ކަމަށެވެ. މި އެއްބަސްވުމަކީ ފުލުހުންގެ މި ދާއިރާގެ ޤާބިލުކަން އިތުރުކުރުމަށް މަގުފަހިވެގެންދާނެ ކަމެއް ކަމަށް ބެލެވެއެވެ.

މި އެއްބަސްވުމުގެ ސަބަބުން ދިވެހިރާއްޖެއާއި ކަޒަކިސްތާނާ ދެމެދު ޓެކްނޮލޮޖީގެ ދާއިރާއިން އޮންނަ ގުޅުން އިތުރަށް ބަދަހިވެ، ދެ ޤައުމަށް ވެސް ފައިދާހުރި ގޮތެއްގައި ކުރިއަށް ދާނެ ކަމަށް އުންމީދުކުރެވެއެވެ.