ސަރުކާރުގެ އެންމެ އިސް ސިޔާސަތަކީ "މޯލްޑިވްސް ފަސްޓް" ޕޮލިސީ ކަމުގައި ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ޤައުމީ ދުވަހުގެ މުނާސަބަތުގައި ދެއްވި ޚާއްޞަ ވީޑިއޯ މެސެޖެއްގައި ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވިދާޅުވެފައިވަނީ، ސަރުކާރުގެ އެންމެ އިސް ސިޔާސަތަކީ "މޯލްޑިވްސް ފަސްޓް" ޕޮލިސީ ކަމަށްވާއިރު، މި ސިޔާސަތުގެ ދަށުން ދިވެހި ޤައުމަށް އިސްކަންދިނުމާއި، ދިވެހީންގެ މިނިވަންކަމާއި އަމިއްލަވަންތަކަން ކަށަވަރުކޮށް ބޭއްވުމަށް ރައީސް ޑރ. މުޙައްމަދު މުޢިއްޒު އަބަދުވެސް އިސްކަންދެއްވާ ކަމަށެވެ.
"ސަރުކާރުގެ އެންމެ އިސް ސިޔާސަތަކީ "މޯލްޑިވްސް ފަސްޓް" ޕޮލިސީ، މި ސިޔާސަތުގެ ދަށުން ދިވެހި ޤައުމަށް އިސްކަންދިނުމާއި، ދިވެހީންގެ މިނިވަންކަމާއި އަމިއްލަވަންތަކަން ކަށަވަރުކޮށް ބޭއްވުމަށް ރައީސް ޑރ. މުޙައްމަދު މުޢިއްޒު އަބަދުވެސް އިސްކަންދެއްވާ"
ނައިބްރައީސް ޙުސެއިން ލަޠީފު
ރާއްޖޭގެ މިނިވަންކަމަށް ބުރޫއަރާނެ އެއްވެސް ކަމަކަށް ޖާގަ ނުދިނުމަށް ސަރުކާރުން އިސްކަންދޭ ކަމަށާއި، މި އަމާޒަށް ވާޞިލްވުމަށް އެންމެން އެކުގައި މަސައްކަތްކުރުމުގެ މުހިންމުކަން ނައިބު ރައީސް ފާހަގަކުރެއްވިއެވެ. އަދި ބޮޑުތަކުރުފާނު ފަދަ ބަޠަލުންގެ ހިތްވަރުން ޢިބްރަތް ޙާޞިލްކޮށް، ޤައުމަށް ޚިދުމަތްކުރާނެ ދަރީން ބިނާކުރުމުގެ މުހިންމުކަން ވެސް އެމަނިކުފާނު ފާހަގަކުރެއްވިއެވެ.
ނައިބްރައީސްގެ ވީޑިއޯ މެސެޖްގައި މިމޭރުމުން ވާހަކަފުޅު ދައްކަވާފައިވާއިރު، ޤައުމީ ދުވަހާ ގުޅިގެން ބޭއްވުނު ޚާއްޞަ ޖަލްސާގައި ރައީސް ޑރ.މުޢިއްޒު ވާހަކަފުޅު ދައްކަވަމުން ވިދާޅުވީ، ދިވެހި ކާބަފައިންނަކީ ޤައުމުގެ ދިފާޢުގައި ހުރިހާ މާނައެއްގައި، ހުރިހާ ޒަމާނެއްގައި މަސައްކަތްކުރި ބައެއް ކަމަށާއި، ދިވެހިންނަކީ މިނިވަންކަމުގެ ބަޠަލުން ކަމުގައެވެ. މި ޖަލްސާގައި 7 ބޭފުޅަކަށް ޝަރަފުވެރިކަމުގެ ޤައުމީ އިނާމު އަދި 10 ބޭފުޅަކާއި ކުންފުންޏަކަށް ހިތްވަރު ދިނުމުގެ ޤައުމީ އިނާމު ރައީސް އަރުވާފައިވެއެވެ.
މީގެ އިތުރުން ނައިިބު ރައީސް ގެ މި ވީޑިއޯ މެސެޖުގައި ޤައުމީ ދުވަހުގެ ހެޔޮއެދުންތައް ދިވެހި ހުރިހާ ލޮބުވެތި ރައްޔިތުންނަށް އަރިސްކުރައްވައި، ޤައުމުގެ ދެކެ ލޯބިވުން އިސްކުރުމަށް ރައްޔިތުންނަށް އިލްތިމާސް ކުރައްވާފައިވެއެވެ.
Advertisement
This content is created and paid for by advertisers and does not involve Voice Journalists
