ގެއެއްގެ ތެރޭގައި މީހުން ނިދަން ތިއްބައި ފާޚާނާ ފެންލައިޓުން ވަދެ، ވަޅިން ބިރުދައްކައިގެން ފޭރިއްޖެއެވެ.
ފުލުހުން ބުނީ، މާފަންނު ސަރަހައްދުގައި ހުރި ގެއެއްގެ ތެރެއަށް ފެންލައިޓުން ވަދެ، ކޮޓަރިއެއްގެ ތެރޭގައި ނިދާފަައި ތިބި ދެ މީހެއްގެ ކަރުގައި ވަޅި ޖައްސައި އެއްވެސް ހަރަކާތެއް ކޮށްފިނަމަ މަރާލާނެ ކަމަށް ބުނެ ބިރުދައްކައިގެން ފޭރުނު މައްސަލައެއް މިމަހު 4 ވަނަ ދުވަހުރޭ ދަންވަރު ރިޕޯޓް ކޮށްފައިވާ ކަމަށެވެ.
އެގޮތުމް، އެގޭގެ ދެމީހުންގެ އަތުން މޯބައިލް ފޯނާއި ލެޕްޓޮޕް އަދި އެހެނިހެން ތަކެތި ފޭރިގަތް ކަމަށް ބުނެފައިވެއެވެ.
ފުލުހުންގެ މަޢުލޫމާތު ދޭގޮތުގައި ފޭރުމަށްފަހު ދެމީހުން ފިލައިގެން ގޮސްފައިވަނީ ފާޚާނާއަށް ވަދެ އެތެރޭން ދޮރު ތަޅުލައި ފެންލައިޓުން ނުކުމެގެންނެވެ.
ފުލުހުން އިތުރަށް ބުނީ، މި ދެމީހުން ރޭގެ ވަގުތުގައި ހައްޔަރުކޮށް އަދި އެމީހުން އެގެއިން ފޭރުނު ލެޕްޓޮޕް އާއި މޯބައިލް ފޯނުތައް ވަނީ ހޯދާފައެވެ. އަދި އެމީހުން ވަގަށް ނަގާފައިވާ ކަމަށް ތުހުމަތު ކުރެވޭ އެހެނިހެން ތަކެތި ވެސް އެމީހުން އަތުން ފެނިފައިވާ ކަމަށެވެ.
އަދި ފޭރުނު ދެމީހުން މިހާރު ހައްޔަރު ކޮށްފައިވާ ކަމަށާ، ހައްޔަރުކޮށްފައިވަނީ މ. ދާރުލްގަރާރު، އިސްމާއިލް ވިޝާލް (30އ) އަދި ވިދުވަރު، ބ. ދަރަވަންދޫ، ހުސައިން ޝާއިފް (32އ) ކަމަށް ވެސް ބުންޏެވެ.
މި މައްސަލަ ފުލުހުން ގެންދަނީ ތަޙުޤީޤު ކުރަމުންނެވެ.
Advertisement
This content is created and paid for by advertisers and does not involve Voice Journalists
