ޖުޑިޝަރީގެ އިދާރީ އެންމެ އިސް މަޤާމު ކަމަށްވާ ޗީފް ޖުޑީޝަލް އެޑްމިނިސްޓްރޭޓަރގެ މަޤާމުން އައިޝަތު ރިޒުނާ މިއަދު އިސްތިއުފާ ދެއްވައިފިއެވެ. މި އިސްތިއުފާ ދެއްވާފައިވަނީ ޖުޑީޝަލް ސާވިސް ކޮމިޝަން (ޖޭއެސްސީ) އިން އޭނާއާ ގުޅޭ ޝަކުވާތަކެއް ބަލަމުންދަނިކޮށެވެ.
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ މީޑިއާ އޮފިޝަލަކު ކަށަވަރުކޮށްދެއްވި ގޮތުގައި، ރިޒުނާ އިސްތިއުފާގެ ސިޓީ ހުށަހަޅުއްވާފައިވާކަން ޑީޖޭއޭގެ މުވައްޒަފުންނަށް އަންގަވައި މެސެޖެއް ފޮނުއްވާފައިވެއެވެ.
ޖޭއެސްސީން ރިޒުނާއާ ގުޅޭގޮތުން ބަލަމުންދިޔަ މައްސަލައަކީ މުވައްޒަފުން ނެގުމާ ގުޅޭގޮތުން ހުށަހެޅުނު ޝަކުވާއެއް ކަމަށް މަޢުލޫމާތު ލިބިފައިވެއެވެ. ނަމަވެސް ޖޭއެސްސީގެ ސިޔާސަތަކީ މައްސަލައެއްގައި ގޮތެއް ނިންމުމުގެ ކުރިން ތަފުސީލު ހާމަނުކުރުން ކަމަށްވާތީ، މި މައްސަލައާ ގުޅޭ ރަސްމީ ބަޔާނެއް އަދި ދީފައެއް ނުވެއެވެ.
ރިޒުނާ ޗީފް ޖުޑީޝަލް އެޑްމިނިސްޓްރޭޓަރގެ މަޤާމަށް އައްޔަންކުރެވުނީ 2020 ވަނަ އަހަރުގެ ސެޕްޓެންބަރު 27 ގައެވެ. މީގެ ކުރިން އޭނާ ވަނީ ސުޕްރީމް ކޯޓުގެ ރަޖިސްޓްރާގެ މަޤާމު ވެސް ފުރުއްވާފައެވެ. ރިޒުނާގެ ކުރިން މި މަޤާމުގައި ހުންނެވީ ޑރ. އަބްދުﷲ ނަޒީރެވެ.
Advertisement
This content is created and paid for by advertisers and does not involve Voice Journalists
