ދިގު މުއްދަތެއްގައި ކުރެވުނު ބޮޑު މަރާމާތަކަށްފަހު، މާލޭގެ އާސަހަރާ މިސްކިތުގެ ތިރީބައި މާދަމާ ރަސްމީކޮށް ހުޅުވުމަށް ވަނީ ހަމަޖެހިފައެވެ.

މިސްކިތުގެ ތިރީބައި އަލުން ހުޅުވުމަށް ހަމަޖެހިފައިވަނީ 5 ސެޕްޓެމްބަރ 2024 ވާ ހުކުރު ދުވަހު (މާދަމާ)ގެ ހުކުރު ނަމާދާ އެކުގައެވެ.

މިކަމާ ގުޅިގެން މާލެ ސިޓީ ކައުންސިލުގެ މޭޔަރ އާދަމް ޢާޡިމް މިއަދު މިސްކިތަށް ޒިޔާރަތްކުރައްވައި، ހުޅުވުމުގެ އެންމެ ފަހުގެ ތައްޔާރީތައް ބައްލަވައިލެއްވިއެވެ. މޭޔަރުގެ މި ޒިޔާރަތުގައި މިސްކިތުގެ މަރާމާތުގެ މަސައްކަތްތައް ނިމިފައިވާ މިންވަރާއި، ހުޅުވުމަށް ކުރެވިފައިވާ ތައްޔާރީތައް ވަނީ ބައްލަވާލައްވާފައެވެ.

Advertisement

އާސަހަރާ މިސްކިތުގެ ތިރީބައި އަލުން ހުޅުވުމަކީ މާލޭގެ ގިނަ ރައްޔިތުން އިންތިޒާރުކުރަމުން އައި ކަމެއްކަން ފާހަގަކުރެވެއެވެ. މި މިސްކިތަކީ މާލޭގެ އެންމެ ގިނަ މީހުން ނަމާދުކުރުމަށް ޒިޔާރަތްކުރާ މިސްކިތްތަކުގެ ތެރެއިން އެއް މިސްކިތެވެ.

އާސަހަރާއަކީ މާލޭގައި ޒަމާނުންސުރެއް މަރުވާ މީހުން ވަޅުލަން މާލޭގެ ހަތަރު އަވަށުގައި ބޭނުން ކުރި ޤަބުރުސްތާނުތައް ފުރި އެތަން ބޭނުން ނުކުރެވޭ ޙާލަތައް ދިޔުމުން މާލޭގައި މަރުވާ މީހުން ވަޅުލުމަށްޓަކައި ގާއިމް ކުރެވިގެން ދިޔަތަނެކެއެވެ. އާސަހަރާ ތަރައްޤީކުރިއިރު ކަށުކަމާ ކެމީގެ އެންމެހާ ކަންކަން ކުރެވޭނެ އިންތިޒާމު ޤާއިމްކުރިއެވެ. އަދި އެ ތަނުގައި މަސްޖިދުލް ތަޢާވުންގެ ނަމުގައި މިސްކިތެއް ބިނާކުރިއެވެ.