ޔުގަންޑާގެ އޮލިމްޕިކް މެރަތަން ދުވުންތެރިޔާ ރެބެކާ ޗެޕްޓެގޭ (33 އަހަރު)ގެ ގައިގައި އޭނާގެ ލޯބިވެރިޔާ އަލިފާން ރޯކޮށްލުމުން ލިބުނު އަނިޔާގެ ސަބަބުން ބުރާސްފަތި ދުވަހު މަރުވެއްޖެއެވެ. މި ހާދިސާ ހިނގީ ކެންޔާގައެވެ.

ޔުގަންޑާ އޮލިމްޕިކް ކޮމިޓީގެ ރައީސް ޑޮނަލްޑް ރުކާރޭ ވިދާޅުވި ގޮތުގައި، އާދީއްތަ ދުވަހު ހިނގި މި ހާދިސާގައި ޗެޕްޓެގޭގެ ހަށިގަނޑުގެ 75 އިންސައްތަ އަށްވުރެ ބޮޑުބައެއް ވަނީ އަނދާފައެވެ. އޭނާ އިތުރަށް ވިދާޅުވީ އަންހެނުންނަށް ކުރާ އަނިޔާތައް އެ ފަރާތުން ކުށްވެރިކުރާ ކަމަށެވެ.

ޕެރިހުގެ އޮލިމްޕިކްސްގައި ބައިވެރިވި މި ދުވުންތެރިޔާގެ ގައިގައި ރޯކޮށްލުމުން ވަނީ ކެންޔާގެ އެލްޑޮރެޓް ސިޓީގެ ހޮސްޕިޓަލަކަށް ވައްދާފައެވެ. އެ ހޮސްޕިޓަލްގެ ކްލިނިކަލް ސާވިސަސްގެ ސީނިއަރ ޑައިރެކްޓަރ އޯވެން މެނާޗް ވިދާޅުވި ގޮތުގައި، އޭނާ މަރުވެފައިވަނީ ހަށިގަނޑުގެ މުހިންމު ގުނަވަންތައް މަސައްކަތް ނުކުރުމުގެ ސަބަބުންނެވެ.

ކެންޔާގެ ނޫހެއްކަމަށްވާ "ދަ ސްޓޭންޑަޑް" އިން ބުނެފައިވާ ގޮތުގައި، ހަމަލާދިން ފިރިހެން ކުއްޖާ (ލޯބިވެރިޔަ)އަށް ވެސް އަނިޔާވެ، ހަށިގަނޑުގެ 30 އިންސައްތަ އަނދާފައިވާ ކަމަށް ޑޮކްޓަރުން ބުނެއެވެ. އޭނާއަށް ވެސް ދަނީ އައިސީޔޫގައި ފަރުވާ ދެމުންނެވެ.

ކެންޔާގެ ކުޅިވަރު ވަޒީރު ކިޕްޗުންބާ މުރްކޮމެން ވިދާޅުވި ގޮތުގައި، މިއީ މުޅި ސަރަހައްދަށް ލިބުނު ގެއްލުމެކެވެ. އަދި މިއީ ޖެންޑަރ ބޭސްޑް އަނިޔާތަކާ ދެކޮޅަށް އިތުރަށް މަސައްކަތްކުރަން ޖެހޭކަން ހަނދާންކޮށްދޭ ކަމެއް ކަމަށް ވެސް އޭނާ ވިދާޅުވިއެވެ.

މި ހާދިސާއަކީ ފަހަކަށް އައިސް ކެންޔާގައި އަންހެން އެތުލީޓުންނަށް ދެވޭ އަނިޔާތަކުގެ ތެރެއިން އެންމެ ފަހުގެ ހާދިސާއެވެ. 2021 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް އެ ޤައުމުގައި ތިން ފަހަރު މަތިން ވަނީ ނަން މަޝްހޫރު އަންހެން އެތުލީޓުން މަރާލާފައެވެ.