ދަ ޑިމޮކްރެޓިކް ރިޕަބްލިކް އޮފް ކޮންގޯ އަށް އެމްޕޮކްސް ވެކްސިންގެ ފުރަތަމަ ބެޗް ލިބިއްޖެއެވެ. މި ވެކްސިން ބޭނުންކޮށްގެން، ޔުނައިޓެޑް ނޭޝަންސްއިން ގްލޯބަލް ޕަބްލިކް ހެލްތު އިމަޖެންސީއެއް ކަމުގައި އިޢުލާނުކޮށްފައިވާ އެމްޕޮކްސްގެ ފެތުރުން ހުއްޓުވުމަށް އެހީތެރިވެދޭނެ ކަމަށް ސިއްޙީ ފަރާތްތަކުން އުންމީދުކުރެއެވެ.

ގާތްގަނޑަކަށް 100 މިލިއަން މީހުން ދިރިއުޅޭ މި މެދު އެފްރިކާގެ ޤައުމަކީ މިހާރު އެމްޕޮކްސްގެ ފެތުރުމުގެ މައި މަރުކަޒެވެ. ވޯލްޑް ހެލްތު އޯގަނައިޒޭޝަން (ޑަބްލިޔުއެޗްއޯ) އިން ވަނީ ފާއިތުވި މަހު މިކަން ގްލޯބަލް ޕަބްލިކް ހެލްތު އިމަޖެންސީއެއްގެ ގޮތުގައި އިޢުލާނުކޮށްފައެވެ.

ޔޫރަޕިއަން ޔޫނިއަނުން ހަދިޔާކުރި ވެކްސިން ޑޯސްތައް ހިފައިގެން ދިޔަ މަތިންދާ ބޯޓު ވަނީ ބުރާސްފަތި ދުވަހު މެންދުރުފަހު 1 ޖަހާއިރު (ޖީއެމްޓީން މެންދުރު 12 ޖަހާއިރު) ވެރިރަށް ކިންޝާސާއަށް ޖައްސާފައެވެ.

Advertisement

ކޮންގޯގެ ސިއްޙީ ވަޒީރު ސެމުއެލް ރޮޖަރ ކަމްބާ މުލަމްބާ ވިދާޅުވި ގޮތުގައި، އަލަށް ގެނެވުނު މި ވެކްސިނަކީ އެމެރިކާގައި އޭގެ ނަތީޖާ ދައްކާފައިވާ ވެކްސިނެކެވެ. އަދި މި ވެކްސިން ކޮންގޯގެ ބޮޑެތި މީހުންނަށް ދޭން ފަށާނެ ކަމަށް އޭނާ ވިދާޅުވިއެވެ.

"އެކުއޭޓަރ އަދި ސައުތު ކިވު ފަދަ ސަރަޙައްދުތަކަކީ މި ބަލިން އެންމެ ބޮޑަށް އަސަރުކޮށްފައިވާ ސަރަޙައްދުތައް ކަން އަޅުގަނޑުމެންނަށް އެނގޭ... ވީހާވެސް އަވަހަކަށް މި ވައިރަސް ކޮންޓްރޯލްކުރުމަކީ އަޅުގަނޑުމެންގެ މަޤްޞަދު," އޭނާ އިތުރަށް ވިދާޅުވިއެވެ.

މި ވެކްސިނަކީ ޑެންމާކުގެ ބަވޭރިއަން ނޯޑިކް ފާމަސިއުޓިކަލް ލެބޯޓްރީން އުފެއްދި ވެކްސިނެކެވެ. މިއީ ޔޫރަޕާއި އެމެރިކާގައި ހުއްދަ ލިބިފައިވާ ހަމައެކަނި ވެކްސިނެވެ. އަދި މި ވެކްސިން ދެވޭނީ ހަމައެކަނި ބޮޑެތި މީހުންނަށެވެ. އެކަމަކު މިހާރު ދަނީ 12 އަހަރުން މަތީގެ ކުދިންނަށް ވެސް މި ވެކްސިން ދިނުމާ ގުޅޭގޮތުން ދިރާސާތަކެއް ކުރަމުންނެވެ.