ރައީސް ޑރ. މުހައްމަދު މުއިއްޒުގެ ގައުމީ އެޖެންޑާގެ އެންމެބޮޑު އެއް އަމާޒަކީ މަސްތުވާތަކެތީގެ ވަބާއިން ގައުމު ސަލާމަތް ކުރުން ކަމުގައި ނައިބު ރައީސް އަލްއުސްތާޛް ޙުސެއިން މުޙައްމަދު ލަޠީފު ވިދާޅުވެއްޖެއެވެ.

އަތޮޅު ފެންވަރުގައި ގައުމީ ދުވަސް ފާހަގަކުރަން ށ. މާއުނގޫދޫގައި ބޭއްވި ޖަލްސާގައި ވާހަކަ ދައްކަވަމުން ނައިބު ރައީސް ވިދާޅުވީ ރައީސްގެ ގައުމީ އެޖެންޑާގެ އެންމެ ބޮޑު އެއް އަމާޒަކީ މަސްތުވާތަކެތީގެ ވަބާއިން ގައުމު ސަލާމަތް ކުރުން ކަމަށާއި، ގާނޫނު މުގުރަން އެއްވެސް ފުރުސަތެއް އެމަނިކުފާނު ނުދެއްވާނެ ކަމަށެވެ.

ށ. މާއުނގޫދޫ ސުކޫލް ހޯލުގައި ކުރިއަށްދިޔަ މި ޖަލްސާގައި ވާހަކަ ދައްކަވަމުން ނައިބު ރައީސް ވިދާޅުވީ ދިވެހި ދަރިންނަށް ދިވެއްސަކަށް ވީތީ ފަހްރުވެރިވާން ދަސްކޮށްދޭން ޖެހޭކަމަށެވެ. އަދި ދިވެހިބަހުން ރީތިކޮށް ވާހަކަދައްކައި ލިޔެކިޔުމަކީ ކިހާ އުފާވެރި ފަހްރުވެރިކަމެއްކަން ވިސްނައިދިނުމަށް ބާރުއެޅުއްވުމަށްވެސް ވިދާޅުވިއެވެ.

Advertisement

ގައުމަށް އަމާންކަމާއި މަސަލަސްކަން ޔަގީންކޮށްދެއްވައި، އާމްދަނީ ލިބޭނެ އިތުރު ގިނަ ސިނާއަތްތައް ތައާރަފް ކުރުމަށް ވެސް ރައީސް އިސްކަން ދެއްވާކަން ފާހަގަކުރައްވައި ނައިބު ރައީސް ވިދާޅުވީ އެމަނިކުފާނު ވެރިކަމާ ހަވާލުވެވަޑައިގެންނެވީ ގައުމުގެ މިނިވަންކަމާމެދު ދިވެހިންގެ ހިތުގައި ކަންބޮޑުވުން އޮތް ދަނޑިވަޅެއްގައި ކަމަށެވެ.

ނައިބު ރައީސް ވިދާޅުވީ އެމަނިކުފާނުގެ މަސައްކަތްޕުޅުން ވޭތުވެ ދިޔަ ދުވަސްތަކުގައި މުހިންމު ލަނޑުދަނޑިތަކެއް ހާސިލްވެފައިވާ ކަމުގައެވެ.

މީގެ އިތުރުން ނައިބު ރައީސް ވިދާޅުވީ ރައީސްގެ އަމާޒަކީ އަމިއްލަ ފައިމައްޗަށް ތެދުވެ ތިބި ފުދުންތެރި ރައްޔިތަކު ދިރިއުޅޭ ގައުމަކަށް ހައްދަވާ މި ގައުމު ބިނާކުރެއްވުން ކަމަށެވެ.

އަދި ކޮންމެ ގައުމީ މަސްލަޙަތެއްގައި އަބަދުވެސް ދިވެހިންނަށް އިސްކަން ދެއްވާނޭކަން ރައީސް ސާބިތުކޮށްދެއްވަމުން ގެންދަވާ ކަމަށްވެސް ނައިބު ރައީސް ވިދާޅުވިއެވެ.