ކުރީގެ ޕްރޮސެކިއުޓަރ ޖެނެރަލް ހުސެއިން ޝަމީމަށް ހަމަލާ ދިން މައްސަލައިގެ ޝަރީޢަތް މާދަމާ ފެށުމަށް ހަމަޖެހިއްޖެއެވެ. މި މައްސަލައިގައި ދަޢުވާ އުފުލިފައިވާ ހަތް މީހުންގެ ޝަރީޢަތް ކުރިއަށް ގެންދިއުމަށް ހަމަޖެހިފައިވަނީ އޮންލައިންކޮށް މެންދުރުފަހު 2:30 ގައެވެ.

މިދިޔަ އަހަރުގެ ޖަނަވަރީ 31 ވަނަ ދުވަހު ޝަމީމަށް ހަމަލާ ދީފައިވަނީ އޭނާ ދަރިފުޅު ސްކޫލަށް ގެންގޮސް އެނބުރި ގެއަށް އަންނަނިކޮށެވެ. މަރުތޭލަކުން ދިން މި ހަމަލާގައި ޝަމީމްގެ އަތަށް އަނިޔާވިއެވެ. މި ހާދިސާއާ ގުޅިގެން ސިފައިންވަނީ ޝަމީމްގެ ސެކިއުރިޓީ ވަރުގަދަކޮށްފައެވެ.

މައްސަލައިގައި ހައްޔަރުކުރެވުނު ހަތް މީހުންގެ ތެރެއިން މިދުހަތު އާދަމްގެ މައްޗަށް ކުރެވެނީ ސީދާ ހަމަލާ ދިންކަމުގެ ތުހުމަތެވެ. އަދި މުހައްމަދު ޖަޒްލާނަކީ ސައިކަލު ދުއްވި މީހާކަމަށް ތުހުމަތުކުރެވޭއިރު، އަހުމަދު މައިސާން ހާޝިމްގެ މައްޗަށް ކުރެވެނީ ސައިކަލު ހޯދައިދިން ކަމުގެ ތުހުމަތެވެ. އަނެއް ހަތަރު މީހުންނަކީ ހަމަލާ ރޭވުމާއި ހަމަލާ ދިން ވަގުތު ސަރަހައްދުގައި ކާރެއްގައި މަޑުކޮށްގެން ތިބި ކަމަށް ތުހުމަތުކުރެވޭ މީހުންނެވެ.

Advertisement

މި މައްސަލައިގައި ހުރިހާ މީހުންގެ މައްޗަށްވެސް ކުރެވެނީ ނުރައްކާތެރި ހަތިޔާރެއް ބޭނުންކޮށްގެން ގަސްދުގައި މީހަކު މަރާލަން އުޅުމުގެ ދަޢުވާއެވެ. ޝަރީޢަތް ނިމެންދެން މި ހަތް މީހުންވެސް ވަނީ ބަންދުގައި ބެހެއްޓިފައެވެ.

މި މައްސަލައިގެ ޝަރީޢަތް ފެށުމަށް ތައްޔާރުވަމުންދަނިކޮށް، އޮގަސްޓު 22 ގައި ޝަމީމް އޭނާގެ މަޤާމުން ވަނީ އިސްތިއުފާ ދެއްވާފައެވެ. މިއީ އޭނާގެ މައްޗަށް އިތުބާރު ނެތްކަމުގެ މައްސަލައެއް މަޖިލީހަށް ހުށަހެޅި، ވޯޓަށް އެހުމާ ކައިރިވެފައިވަނިކޮށް ދެއްވި އިސްތިއުފާއެކެވެ.