ޓައިމް މަޖައްލާއިން ދެވަނަ ފަހަރަށް އާންމުކޮށްފައިވާ "ޓައިމް 100 އޭއައި" ލިސްޓުގައި ޓެކްނޮލޮޖީ ދުނިޔޭގެ 10 އިސްވެރިން ހިމަނައިފިއެވެ. މި ލިސްޓުގައި ހިމެނޭ ފަރާތްތަކަކީ އާޓިފިޝަލް އިންޓެލިޖެންސް (އޭއައި) ދާއިރާގައި އެންމެ ނުފޫޒު ގަދަ 100 ފަރާތެވެ.

މި ލިސްޓުގައި ހިމެނޭ ޓެކްނޮލޮޖީ ދާއިރާގެ ވެރިންގެ ތެރޭގައި އެލްފަބެޓް (ގޫގުލްގެ މައި ކުންފުނި) ގެ ސީއީއޯ ސުންދަރ ޕިޗައި، އޯޕަންއޭއައިގެ ސީއީއޯ ސެމް އޯލްޓްމަން، މައިކްރޯސޮފްޓްގެ ސީއީއޯ ސަތްޔާ ނަޑެއްލާ އަދި އެންވިޑިއާގެ ސީއީއޯ ޖެންސަން ހުއާންގ ހިމެނެއެވެ.

މީގެ އިތުރުން، މި ލިސްޓުގައި މެޓާ (ކުރީގެ ފޭސްބުކް) ގެ ސީއީއޯ މާކް ޒަކަބާގް، ޑީޕްމައިންޑްގެ ސީއީއޯ ޑެމިސް ހަސަބިސް، އެންތްރޮޕިކްގެ ސީއީއޯ ދާރިއޯ އަމޯދީ، ސެރިބްރަސް ސިސްޓަމްސްގެ ސީއީއޯ އެންޑްރޫ ފެލްޑްމަން، މައިކްރޯސޮފްޓް އޭއައިގެ ސީއީއޯ މުސްތަފާ ސުލައިމާނު އަދި ޔޫރެކާ ލެބްސްގެ ބާނީ އެންޑްރެޖް ކަރްޕާތީ ހިމެނެއެވެ.

Advertisement

މި ލިސްޓުގައި ހިމެނިފައިވާ ފަރާތްތަކުން، އޭއައި ދާއިރާގެ ކުރިއެރުމަށާއި، އޭއައި އާންމުންގެ މެދުގައި މަޝްހޫރުކުރުމަށް ބޮޑު މަސައްކަތްތަކެއް ކޮށްފައިވާކަމަށް ޓައިމް މަޖައްލާއިން ބުނެފައިވެއެވެ. އަދި މި ފަރާތްތަކަކީ އޭއައިގެ މުސްތަޤްބަލް އަދި އޭގެ ސުލޫކީ އަދި ޒިންމާދާރު ބޭނުންކުރުން ބައްޓަންކުރުމުގައި މުހިންމު ދައުރެއް އަދާކުރާ ފަރާތްތައް ކަމަށްވެސް ބުނެފައިވެއެވެ.

މި އަހަރުގެ ލިސްޓުގައި ހިމެނޭ 91 ފަރާތަކީ ފާއިތުވި އަހަރުގެ ލިސްޓުގައި ނުހިމެނޭ އައު ފަރާތްތަކެކެވެ. މީގެ ތެރޭގައި 77 އަހަރުގެ ޗައިނާގެ ކޮމްޕިއުޓަރ ސައިންޓިސްޓް އެންޑްރޫ ޔާއޯ އާއި 15 އަހަރުގެ އެމެރިކާގެ ފްރަންޗެސްކާ މަނީ ހިމެނެއެވެ. ފްރަންޗެސްކާ މަނީއަކީ ޑީޕްފޭކްގެ ޝިކާރައަކަށްވާ މީހުން ހިމާޔަތްކުރުމަށް މަސައްކަތްކުރާ ކުޑަކުއްޖެކެވެ.