އަރަބި ދުނިޔޭގެ ފުރަތަމަ ނިއުކުލިއާ ހަކަތަ އުފައްދާ ޕްލާންޓު ބަރަކާ ނިއުކުލިއާ ޕަވާ ޕްލާންޓް ޔުނައިޓެޑް އަރަބިކް އެމިރޭޓްސްއިން ތަރައްގީކޮށް ނިންމައިފިކަން ބުރާސްފަތި ދުވަހު އިއުލާނުކޮށްފި އެވެ.

އަބޫދާބީގައި ހުންނަ ބަރަކާ ނިއުކުލިއާ ޕަވާ ޕްލާންޓުގެ ހަތަރުވަނަ ރިއެކްޓަރު ބޭނުންކުރަން ފެށުމުން އަހަރެއްގެ މައްޗަށް 40 ޓަރަވޮޓް-އަވާސްގެ ހަކަތަ އެ ޕަވާ ޕްލާންޓުން އުފައްދާނެކަމަށް އެމިރޭޓްސްގެ ނިއުކުލިއާ ހަކަތަ ކުންފުނި އެމިރޭޓްސް ނިއުކްލިއާ އެނާޖީ ކޯޕަރޭޝަން (އީއެންއީސީ)އިން ވަނީ ބުނެފައެވެ.

އީއެންއީސީ ބުނި ގޮތުގައި އެ ނިއުކުލިއާ ޕަވާ ޕްލާންޓުން އެމިރޭޓްސްއަށް ބޭނުންވާ ހަކަތައިގެ 25 އިންސައްތަ އުފައްދާނޭ ކަމަށާއި ނިއުޒިލެންޑުގައި އަހަރެއްގެ މައްޗަށް ބޭނުންކުރާ ހަކަތައާ އެއް މިންވަރުކަމަށެވެ. ހޫނު ގަދަވުމުގެ ސަބަބުން ހުރިހާ ތަނެއްގައިހެން އަބަދުވެސް އެއާ ކޮންޑިޝަން ބޭނުންކުރަންޖެހޭ އެމިރޭޓްސްއަށް މިއީ ބޮޑު ލުޔަކަށްވާނޭ ކަމަށްވެސް އީއެންއީސީ އިންވަނީ ބުނެފައެވެ.

ބަރަކާގެ ހިދުމަތް އެންމެ ފުރަތަމަ ފެށީ 2020 ވަނަ އަހަރު އެވެ. އެއީ އެ ޕަވަ ޕްލާންޓުގެ ހަތަރު ރިއެކްޓަރުގެ ތެރެއިން ފުރަތަމަ ރިއެކްޓަރުގެ މަސައްކަތް ނިމުމާ ގުޅިގެންނެވެ. 

އީއެންއީސީން ބުނި ގޮތުގައި މި ޕަވާ ޕްލާންޓުން ދުނިޔޭގައި އެންމެ ގިނައިން ތެޔޮ އުފައްދާ ކުންފުނިތަކުގެ ތެރޭގައި ހިމެނޭ އަބޫދާބީ ނޭޝަނަލް އޮއިލް ކޮމްޕެނީއާއި އެމިރޭޓްސް ސްޓީލް އަދި އެމިރޭޓްސް ގްލޯބަލް އެލުމިނިއަމް އިން ހަކަތަ ޕޯރުކޮށްދޭނެއެވެ.

އިމާރާތުގެ އިތުރަށް ދުނިޔޭގެ ނިސްބަތުން އެންމެ ގިނައިން ތެޔޮ އުފައްދާ ބޭރުކުރާ ގައުމުކަމަށްވާ ސައުދީ އަރަބިއްޔާއިންވެސްވަނީ ނިއުކުލިއާ ރިއެކްޓަރުތަކެއް ގާއިމުކޮށް ޕަވާ ޕްލާންޓެއް އެޅުމަށް ވިސްނާކަން ހާމަކޮށްފަ އެވެ. 
އެމިރޭޓްސްގެ ރައީސް ޝައިހް މުހައްމަދު ބިން ޒާއިދު ސިފަކުރެއްވި ގޮތުގައި ބަރަކާ ޕަވަޕްލާންޓުގެ މަސައްކަތް ނިމުމަކީ ތިމާވެއްޓާ ރަށްޓެހި ގޮތަށް ހަކަތަ އުފައްދައި ނެޓް ޒީރޯގެ އަމާޒު ހާސިލުކުރުމަށް އެ ގައުމުން ކުރާ މަސައްކަތުގައި ކުރިއަށް އެޅުނު ބޮޑު ފިޔަވަޅެކެވެ.