އަޒަރްބައިޖާން އެއާލައިންސް އިން ރާއްޖެއަށް ދަތުރު ކުރަން ފަށަން ނިންމައިފި އެވެ.
އަންނަ ނޮވެމްބަރު މަހުގެ 8 ވަނަ ދުވަހު ދަތުރުތައް ފެށުމަށް ހަމަޖެހިފައިވާއިރު، މިއީ އެ އެއާލައިނުން ރާއްޖެއަށް ދަތުރުކުރާ ފުރަތަމަ ފަހަރެވެ.
އެ އެއާލައިނުން ރާއްޖެއަށް ހަފްތާއަކު ދެ ދަތުރު ކުރަން ވަނީ ހަމަޖެހިފައެވެ. އެއީ ހުކުރު ދުވަހާއި އާދީއްތަ ދުވަހު އެވެ. އަޒަރުބައިޖާނަށް އެނބުރިދާ ފްލައިޓްތައް އޮންނާނީ ހޮނިހިރު އަދި ހޯމަ ދުވަހުގައެވެ.
އަޒަރުބައިޖާން އެއާލައިންސް އިން މިހާރު ވެސް ދުނިޔޭގެ ބޮޑެތި ސިޓީތަކަށް ދަތުރުކުރެއެވެ. އޭގެ ތެރޭގައި ބެއިޖިން، ލަންޑަން، ބާސެލޯނާ، ޕެރިސް އަދި މިލާން ހިމެނެއެވެ.
އެ އެއާލައިނުން ބުނެފައިވާގޮތުން މި ދަތުރުތައް ފެށުމުން ދެ ގައުމުގެ މެދުގައި ދަތުރުކުރާ މީހުންނަށް އެހެން ގައުމެއްގައި މަޑުކުރަންޖެހުމުން ވަގުތު ގެއްލުމާއި ކުރިމަތިވާ އުނދަގޫތައް ނިމުމަކަށް އަންނާނެ އެވެ.
އަދި މީގެއިތުރުން ދަތުރުތައް ފެށުމާއެކު އެއާލައިނުގެ ވެބްސައިޓުންނާއި މޯބައިލް އެޕުގެ އިތުރަށް އޭޒީއޭއެލް ޓިކެޓު އޮފީސްތަކުން ޓިކެޓު ނެގޭނެ ކަމަށް އަޒަރްބައިޖާން އެއާލައިންސްއިން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
