މިއަދު އިރުއޮއްސުމާ ދިމާކޮށް މައްޗަންގޮޅީގައި ހުރި ގެއެއްގެ ކޮޓަރިތެރެއަށް އެނބުރިދަގަނޑެއް ވެއްޓި، ގެއްލުންތަކެއް ލިބިއްޖެއެވެ.

މި ހާދިސާ ހިނގީ އެ ގޭގެ ކައިރީގައި ހިނގަމުންދާ އިމާރާތްާރާތް ކުރުމުގެ މަސައްކަތަކުން ވެއްޓުނު ދަގަނޑު ބުރިއެއް އެ ގޭގެ ފުރާޅު ފޫއަޅުވައިލައި ކޮޓަރިއަކަށް ވެއްޓުމުންނެވެ.

މި ހާދިސާގައި އެއްވެސް މީހަކަށް އަނިޔާއެއް ވެފައި ނުވާކަން އެ ގޭގެ މީހުން ވަނީ ބައެއް މީޑިއާތަކަށް ކިޔައިދީފައެވެ. ނަމަވެސް، މި ހާދިސާ ހިނގުމުގެ ކުޑައިރުކޮޅެއް ކުރިން އެ ކޮޓަރީގައި ހުރި ބަންކު ބެޑުގައި ދޮޅު އަހަރުގެ ކުޑަކުއްޖަކު ނިދަން އުޅުނުކަމަށް އެ ގޭގެ މީހުން ބުނެފައިވެއެވެ. އެ ކުއްޖާ ނުނިދުމުން ސިޓިންގ ރޫމަށް ގެންދިއުމާ ގުޅިގެން މި ނުރައްކާތެރި ހާދިސާއިން އެ ތުއްތު ކުއްޖާ ސަލާމަތްވެފައިވަނީ ކިރިޔާކަން ފާހަގަކުރެވެއެވެ.

Advertisement

ވެއްޓުނު ދަގަނޑުގަނޑަކީ 18 އެމްއެމްގެ ފަލަ އެނބުރި ދަގަނޑެކެވެ. އަދި އެއީ މީހެއްގެ އިސްކޮޅު ހުންނަވަރުގެ ދިގު ދަގަނޑު ބުރިއެއްކަން އެނގިފައިވެއެވެ. މި ދަގަނޑުގަނޑު ވެއްޓުމުން ބަންކު ބެޑާއި ތަޅުންގަނޑުގައި ޖެހި ގެއްލުންވެފައިވާކަމަށް އެ ގޭގެ މީހުން މައުލޫމާތު ދީފައިވެއެވެ.

އިމާރާތް ކުރުމުގެ މަސައްކަތްތައް ކުރަމުންދާ ސައިޓްތައް ކައިރިން މިފަދަ ނުރައްކާތެރި ހާދިސާތައް މީގެ ކުރިންވެސް މާލޭގައި ވަނީ ހިނގާފައެވެ. އެގޮތުން މީގެ ދެ އަހަރެއްހާ ދުވަސް ކުރިން އެފަދަ އިމާރާތަކުން ވެއްޓުނު ސިމެންތިކޮތަޅަކުން ޖެހި މަގުމަތިން ހިނގާފައި ދިޔަ ތުއްތުކުއްޖަކު މަރުވި ހާދިސާ ފާހަގަކޮށްލެވެއެވެ.