Advertisement

ބިދޭސީން ގެނައުމަށް ހުށަހަޅާ ލިޔެކިއުންތަކަށް ބަދަލު ގެނެސްފި

08 Sep 2024 | 21:59
ރާއްޖޭގައި މަސައްކަތްކުރާ ބިދޭސީންތަކެއް ---

ރާއްޖޭގައި މަސައްކަތް ކުރުމަށް ބިދޭސީން ގެނައުމަށް އެދި ވަޒީފާދޭ ފަރާތްތަކުން ހޯމް މިނިސްޓްރީއަށް ހުށަހަޅަންޖެހޭ ލިޔެކިއުންތަކުގެ ތެރޭގައި ހިމެނޭ ފޯމުތަކަށް އިސްލާހުތަކެއް ގެނެސްފިއެވެ.

ހޯމް މިނިސްޓްރީން ނެރުނު ބަޔާނެއްގައި ވިދާޅުވީ، ރާއްޖޭގައި މަސައްކަތްކުރާ ބިދޭސީންނާ ގުޅޭ ހުއްދަތައް ދޫކުރުމާއި އެމީހުންގެ ކަންކަން ބެލެހެއްޓުމުގެ ހަރުދަނާ ނިޒާމެއް ގާއިމުކުރުމަށް މަސައްކަތްތަކެއް ކުރަމުންދާ ކަމަށެވެ. މި މަސައްކަތުގެ ތެރެއިން، ބިދޭސީން ގެނައުމަށް އެދި ހުށަހަޅަންޖެހޭ ފޯމުތައް މުރާޖައާކޮށް، ޚިދުމަތް ހޯދާ ފަރާތްތަކަށް ފަސޭހައިން ދެނެގަނެވޭނެ ގޮތަށް ބަދަލުކޮށްފައިވާ ކަމަށް މިނިސްޓްރީން ހާމަކުރެއްވިއެވެ.

މިނިސްޓްރީގެ ބަޔާނުގައި އިތުރަށް ވިދާޅުވެފައިވަނީ، މި ބަދަލުތަަކަކީ ބިދޭސީން ގެނައުމާ ގުޅިގެން މިނިސްޓްރީން ފޯރުކޮށްދޭ އެކިއެކި ޚިދުމަތްތަކާ ގުޅޭ ފޯމުތައް ވަޒީފާދޭ ފަރާތްތަކަށް ފަސޭހަވާނެ ގޮތަށް ވަކިކޮށް، އެ ފޯމުތަކުގައިވާ މަޢުލޫމާތުތަކުގެ ޞައްޙަކަން ކަށަވަރުކުރުމަށް ގެނެވުނު ބަދަލުތަކެއް ކަމަށެވެ.

Advertisement

މީގެ އިތުރުން، ރާއްޖޭގައި މަސައްކަތްކުރާ ބިދޭސީންގެ ވޯކް ސައިޓް ރަޖިސްޓަރީކުރުމަށް ހުށަހަޅަންޖެހޭ ލިޔެކިއުންތަކަށްވެސް ބަދަލުތަކެއް ގެނެސްފައިވާ ކަމަށް މިނިސްޓްރީން ހާމަކުރެއްވިއެވެ. މި ބަދަލުތަކުގެ ތެރޭގައި ޕްރޮޖެކްޓް އެގްރީމަންޓް ފޯމު، ކުއްޔަށް ނަގާފައިވާ ތަންތަން ވޯކް ސައިޓްގެ ގޮތުގައި ރަޖިސްޓަރީކުރުމަށް އެދޭ އިޤްރާރު، އަދި އިންސްޓޯލްމަންޓަށް ނަގާފައިވާ އުޅަނދުފަހަރު ވޯކް ސައިޓްގެ ގޮތުގައި ރަޖިސްޓަރީކުރުމަށް އެދޭ އިޤްރާރު ހިމެނެއެވެ.

މިނިސްޓްރީން އަންގަވާފައިވަނީ، މި ފޯމުތައް ހުށަހަޅާނެ ގޮތުގެ ތަފްސީލު އާންމުކޮށްފައިވާނެ ކަމަށާއި، މި އުސޫލާ ޚިލާފަށް ހުށަހަޅާ ފޯމުތައް ބަލައިނުގަންނާނެންނާނެ ކަމަށެވެ.

Advertisement

ކޮމެންޓް

Advertisement

Advertisement