ތައިލެންޑްގެ ހާރިޖީ ވަޒީރުކަމަށް މަރިސް ސަންގި އަމްޕޮންގްސާ އައްޔަނު ކުރުމުން، ރާއްޖޭގެ ޚާރިޖީ ވަޒީރު މޫސާ ޒަމީރު އެކަމަށް މަރުހަބާ ވިދާޅުވެއްޖެއެވެ. 

މަރުޙަބާ ވިދާޅުވެ ޒަމީރު ފޮުނުވި މެސެޖްގައި ވިދާޅުވީ މިދިޔަ އަހަރުތަކުގައި ދެ ގައުމުގެ ރައްޔިތުންގެ މެދުގައި އާލާވެ ބަދަހިވަމުން އަންނަ ގާތް ރަހުމަތްތެރިކަމުގެ ސަބަބުން ގުޅުން އިތުރަށް ބަދަހިވެފައިވާކަމަށެވެ.

ދެ ގައުމުގެ މެދެގައި އޮތް ގާތް ގުޅުން އިތުރަށް ބަދަހިކުރުމަށްޓަކައި ދެ ގައުމަށް ވެސް ފައިދާ ކުރަނިވި ދާއިރާތައް ދެނެގަނެ، އެ ދާއިރާތަކުން މަސައްކަތް ކުރުމުގެ އުންމީދު ކުރައްވާކަމަށް ޒަމީރު ފޮނުއްވި މެސެޖުގައި ވަނީ ވިދާޅުވެފަ އެވެ.

ޒަމީރުގެ މެސެޖްގައި އިތުރަށް ވިދާޅުވީ ދިވެހިރާއްޖެއާއި ތައިލެންޑްގެ ޒަމާންވީ ގުޅުމަކީ އިޙްތިރާމާއި އިތުބާރުގެ މައްޗަށް ބިނާވެފައިވާ ގުޅުމެއްކަމަށާއި، ތައިލެންޑާއި ރާއްޖޭގެ ގުޅުން އިތުރަށް ވަރުގަދަ ކުރެއްވުމަށް މަސައްކަތްޕުޅު ކުރައްވާނެކަމަށެވެ. 

ތައިލެންޑާއި ރާއްޖޭގެ ގުޅުން ވަރުގަދަ ކުރުމާއި ގުޅޭގޮތުން ޒަމީރު މެސެޖެއް ފޮނުއްވިއިރު، ރާއްޖެއިން އެކްސްޕޯޓު ކުރާ މަހުގެ 70 އިންސައްތައަކީ ގަނަޑު ކުރި މަހުގެ ގޮތުގައި ތައިލެންޑަށް ވިއްކާ މަސްކަން ތަފާސްހިސާބުތަކުން ދައްކަ އެވެ. އަދި ރާއްޖެއިން މަސް އެކްސްޕޯޓު ކުރި ޖުމްލަ ބަރުދަނުގެ ނިސްބަތުން ފާއިތުވި 03 އަހަރު ތައިލެންޑަށް ވިއްކި ގަނޑު ކުރި މަހުގެ ނިސްބަތް ހުރީ 59 އިންސައްތަ އާއި 69 އިންސައްތައިގެ ދެމެދުގަ އެވެ.