ކެންޔާގެ ސްކޫލެއްގައި ހިނގި އަލިފާނުގެ ހާދިސާގައި 17 ކުދިން މަރުވުމާ ގުޅިގެން ޤައުމީ ހިތާމަ އިޢުލާންކޮށްފިއެވެ.

ކެންޔާގެ މެދުތެރޭގައިވާ ނިއެރީ ކައުންޓީގެ ހިލްސައިޑް އެންޑަރާޝާ އެކަޑަމީގައި ހިނގި މި ހާދިސާއާ ގުޅިގެން ކެންޔާގެ ރައީސް ވިލިއަމް ރޫޓޯ ވަނީ އާދިއްތަ ދުވަހުން ފެށިގެން ތިން ދުވަހުގެ މުއްދަތަށް ޤައުމީ ހިތާމައެއް އިޢުލާންކޮށްފައެވެ.

ބުރާސްފަތި ދުވަހުގެ މެންދަމު ހިނގި މި ހާދިސާގައި 150 އަށްވުރެ ގިނަ ކުދިން ނިދަމުންދިޔަ ޑޯމިޓަރީއެއްގައި އަލިފާން ރޯވެ، 17 ކުދިން މަރުވެފައިވާކަން ރައީސް ރޫޓޯ ވަނީ ހާމަކޮށްފައެވެ. އަދި މީގެ އިތުރުން 14 ކުދިން ޒަޚަމްވެ ހޮސްޕިޓަލުގައި ފަރުވާ ދެމުންދާ ކަމަށާއި، 70 ކުދިންގެ މަޢުލޫމާތު ނުލިބޭކަމަށް ނައިބު ރައީސް ރިގަތި ގަޗަގުއާ ބުނެފައިވެއެވެ.

ހާދިސާއާ ގުޅިގެން ފުލުހުން ވަނީ ތަޙްޤީޤު ފަށާފައެވެ. ޕޮލިސް ޑިޓެކްޓިވުން ބުނާ ގޮތުގައި މަރުވި ކުދިންގެ ޑީއެންއޭ ޓެސްޓުކުރުމުގެ މަސައްކަތް ވެސް ފަށައިފިއެވެ. މި ހާދިސާ ހިނގަން ދިމާވި ސަބަބާއި އެހީތެރިކަން ލިބުން ލަސްވި ސަބަބު ބަލައި، އެކަމާ ގުޅުންހުރި ފަރާތްތައް ޒިންމާދާރުކުރުވާނެކަމަށް ރައީސް ރޫޓޯ ވަނީ ވިދާޅުވެފައެވެ.

ހާދިސާގައި ކުދިން މަރުވި ޑޯމިޓަރީގެ ހާލަތު ވަރަށް ބޮޑަށް ހަލާކުވެފައިވާ ކަމަށާއި، ގިނަ ކުދިން އެއްތަނެއްގައި ބައިތިއްބާފައި ހުރިކަމަށް ރިޕޯޓުތަކުން ދައްކައެވެ. މިކަމާ ގުޅިގެން ސްކޫލްތަކުގެ ރައްކާތެރިކަމުގެ މައްސަލަ ވަނީ އަލުން ސަމާލުކަމަށް އައިސްފައެވެ.

ކުދިންގެ ޢާއިލާތަކުން ވަނީ ކުދިންނާ ބެހޭ މަޢުލޫމާތު ލިބުމަށް އެދި އާދޭސްކޮށްފައެވެ. ސްކޫލަށް އެއްވެފައިވާ ޢާއިލާތަކުގެ މެދުގައި ހާދިސާއާ ގުޅިގެން ބޮޑު ކަންބޮޑުވުމެއް އޮތްކަން ފާހަގަކުރެވެއެވެ.

ކެންޔާ ރެޑް ކްރޮސްއިން ވަނީ ހާދިސާއިން ސަލާމަތްވި ކުދިންނާއި އެކުދިންގެ ޢާއިލާތަކަށް ނަފްސާނީ އެހީތެރިކަން ފޯރުކޮށްދެމުންދާ ކަމަށް ބުނެފައެވެ.