ސައިބަރ ސްޕޭސްގައި ހަރަކާތްތެރިވާ ހެކްޓިވިސްޓުން ބޭނުންކުރާ އާ އުކުޅުތަކާއި އެމީހުންގެ ޙަރަކާތްތަކުގެ ސަބަބުން ދުނިޔޭގެ ޑިޖިޓަލް އިންފްރާސްޓްރަކްޗަރަށް ނުރައްކަލެއް ކުރިމަތިވަމުންދާކަމަށް ސައިފަރމާ އިން އާންމުކޮށްފައިވާ ރިޕޯޓެއްގައި ބުނެފިއެވެ.

މި ރިޕޯޓުގައި ބުނެފައިވާ ގޮތުގައި ހެކްޓިވިސްޓުންނަކީ ސިޔާސީ، އިޖްތިމާޢީ ނުވަތަ ދީނީ ސަބަބުތަކާ ހުރެ ސައިބަރ ސްޕޭސްގައި އަމަލުތައް ހިންގާ ފަރާތްތަކެވެ. މިފަދަ ފަރާތްތަކުން އެމީހުން ނުރުހޭ ސަރުކާރުތަކާއި ޖަމިއްޔާތަކާ ދެކޮޅަށް އަމަލުތައް ހިންގައެވެ. މިގޮތުން އެމީހުން އެންމެ ގިނައިން ބޭނުންކުރާ ގޮތްތަކުގެ ތެރޭގައި ޑިސްޓްރިބިއުޓެޑް ޑިނައަލް އޮފް ސަރވިސް (ޑީޑީއޯއެސް) ހަމަލާތަކާއި، ވެބްސައިޓްތަކަށް ނުފޫޒު ފޯރުވުމާއި، ސިއްރު މަޢުލޫމާތު ހާމަކުރުން ހިމެނެއެވެ.

ޑީޑީއޯއެސް ހަމަލާތަކުގައި ވެބްސައިޓްތަކަށް އެއްފަހަރާ ގިނަ އަދަދެއްގެ ޓްރެފިކް ފޮނުވައި އެ ވެބްސައިޓްތަކަށް ވަދެވެން ނެތް ހާލަތަކަށް ގެންދެއެވެ. ވެބްސައިޓްތަކަށް ނުފޫޒު ފޯރުވުމުގައި ހެކްޓިވިސްޓުން އެ ފަރާތްތަކުގެ މެސެޖްތައް ފެންނަ ގޮތަށް ވެބްސައިޓްތައް ބަދަލުކުރެއެވެ. އަދި ސިއްރު މައުލޫމާތު ހޯދައި އާންމުކޮށް، ވަކި ފަރާތްތަކެއްގެ އަމިއްލަ މަޢުލޫމާތު ހާމަކުރުމުގެ އަމަލުތައް ވެސް ހިންގައެވެ.

Advertisement

ރިޕޯޓުގައި ބުނެފައިވާ ގޮތުގައި ބައެއް ހެކްޓިވިސްޓް ގްރޫޕްތަކުން މިހާރު އެކި ގައުމުތަކުގެ ގްރޫޕްތަކާއެކު ގުޅިގެން މަސައްކަތް ކުރަމުންދެއެވެ. މިސާލަކަށް، ފަލަސްތީނަށް ތާއީދުކުރާ ގްރޫޕްތައް ރަޝިޔާއަށް ތާއީދުކުރާ ގްރޫޕްތަކާ ގުޅިގެން މަސައްކަތްކުރެއެވެ. މިފަދަ ގުޅުންތަކުގެ ސަބަބުން ބޮޑެތި ހަމަލާތައް ރޭވި، އެތައް ބަޔަކަށް އޭގެ އަސަރު ފޯރުވައެވެ.

ހެކްޓިވިސްޓުންގެ އަމަލުތަކުގެ ސަބަބުން ލިބޭ ގެއްލުންތައް ބޮޑުވަމުން ދިޔުމާއެކު، ސަރުކާރުތަކާއި އެކި ޖަމިއްޔާތަކުން ސައިބަރ ސެކިއުރިޓީއަށް އިތުރު އިންވެސްޓްމަންޓްތައް ކުރަމުންދާކަމަށް ރިޕޯޓުގައި ފާހަގަކޮށްފައިވެއެވެ. އަދި މިފަދަ ނުރައްކާތަކުން ސަލާމަތްވުމަށް، ބައިނަލްއަޤްވާމީ ފެންވަރުގައި ގުޅިގެން މަސައްކަތްކުރަން ޖެހޭކަމަށް ރިޕޯޓުގައި ބުނެފައިވެއެވެ.