ތޫފާން ޔާގީގެ ސަބަބުން ވިއެޓްނާމްގައި ބިންގަނޑު ކަނޑައިގެން ދިއުމާއި ފެންބޮޑުވުމުގެ ސަބަބުން 59 މީހުން މަރުވެފައިވާ ކަމަށް ވިއެޓްނާމްގެ ދައުލަތުގެ މީޑިއާ ރިޕޯޓްތައް ބުނެފިއެވެ.

މި ތޫފާނަކީ މިއަހަރު އޭޝިއާގެ އެންމެ ބާރުގަދަ ތޫފާން ކަމަށާއި ޗައިނާ އާއި ފިލިޕީންސަށް ބޮޑެތި ގެއްލުންތަކެއް ލިބުމާ އެކު ހޮނިހިރު ދުވަހު ވިއެޓްނާމްގެ އިރުއުތުރު އައްސޭރިފަށަށް ވަނީ އަރާފަ އެވެ.

ވިއެޓްނާމްގެ ހުޅަނގު އުތުރުގެ ހޯންގް ލިއަން ސޮން ފަރުބަދަތަކުގައި ބިންގަނޑު ކަނޑައިގެން ދިއުމުގެ ސަބަބުން މަރުވި ހަ މީހުންގެ ތެރޭގައި އަލަށް އުފަންވި ތުއްތު ކުއްޖަކާއި އެއް އަހަރުގެ ފިރިހެން ކުއްޖަކު ވެސް ހިމެނެ އެވެ.

Advertisement

އޭއެފްޕީ ނިއުސް އެޖެންސީއަށް މައުލޫމާތު ދެމުން އެގައުމުގެ އޮފިޝަލަކު ވިދާޅުވީ އެ މީހުންގެ ހަށިގަނޑު ފެނިފައި ވަނީ އާދީއްތަ ދުވަހު ކަމަށެވެ.

އޭގެ ތެރޭގައި ވިއެޓްނާމްގެ އުތުރުގެ ފަރުބަދަމަތީ ހޯއާ ބިންހް ޕްރޮވިންސްގެ ބޯކޮށް ވާރޭވެހި ފަރުބަދައެއް ގެއެއްގެ މައްޗަށް ވެއްޓި މަރުވި ހަތަރު މީހުންގެ އާއިލާއެއް ވެސް ހިމެނޭ ކަމަށް ދައުލަތުގެ މީޑިއާއިން ބުނެ އެވެ.

ހޯމަ ދުވަހުގެ ހެނދުނު 20 މީހުންނާއެކު ދަތުރުކުރި ފަސިންޖަރު ބަހެއް، ފަރުބަދަމަތީ ކާއޯ ބަންގް ޕްރޮވިންސްގައި ބިންގަނޑު ކަނޑައިގެން ކޯރަކަށް ވެއްޓިފައިވާކަމަށްވެސް ވަނީ ބުނެފައެވެ.

ފު ތޮ ޕްރޮވިންސްގެ ރަތް ކޯރުގެ މައްޗަށް އަޅާފައިވާ ބްރިޖެއް ވެއްޓުމާ ގުޅިގެން މީހުން ސަލާމަތް ކުރުމުގެ މަސައްކަތް ދަނީ ކުރަމުންނެވެ.

ރިޕޯޓްތައް ބުނާ ގޮތުން ދެ ސައިކަލާއެކު 10 ކާރާއި ޓްރަކް ކޯރަށް ވެއްޓުނެވެ.

ކޯރުން ތިން މީހަކު ސަލާމަތްކޮށް ހޮސްޕިޓަލަށް ގެންދިޔަ ނަމަވެސް އިތުރު 13 މީހަކު އަދި ނުގެނެއެވެ.

ތޫފާން ޔާގީ ވިއެޓްނާމަށް އެރުމިގެ ކުރިން ވަނީ ޗައިނާ އާއި ފިލިޕީންސްގެ ދެކުނުގެ ސަރަހައްދުތައް އަރައި 24 މީހުން މަރާލައި އެތައް ބަޔަކު ޒަހަމްކޮށްލާފަ އެވެ.