ހުޅުމާލޭގެ ސަހަރާ ކުރިމަތީގައިވާ ބިން ހަތަރު ފުރޮޅުލީ އުޅަނދުފަހަރު ޕާކުކުރުމަށް ހަމަޖައްސައިފިއެވެ.

މިކަން އިޢުލާންކުރެއްވީ ޓްރާންސްޕޯޓް މިނިސްޓަރު މުޙައްމަދު އަމީނެވެ. އެ ސަރަހައްދުގައި ބޭއްވުނު ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ، 90,000 އަކަފޫޓުގެ ބިމުން 50,000 އަކަފޫޓު ހަތަރު ފުރޮޅުލީ އުޅަނދުތަކަށް ޚާއްޞަކުރެވޭނެ ކަމަށެވެ.

ބާކީ 40,000 އަކަފޫޓު ބޭނުންކުރެވޭނީ ހުޅުމާލޭ މަގުތަކުން ޓޯކުރެވޭ ނުގަވާއިދުން ޕާކުކޮށްފައިވާ އުޅަނދުތައް ބެހެއްޓުމަށެވެ. މިނިސްޓަރު އަމީން ވިދާޅުވީ، ކުރިއަށް އޮތް ދެ ދުވަހުގެ ތެރޭގައި މި ބިމުގައި ޕާކުކުރުމުގެ ފުރުސަތު ހުޅުވާލެވޭނެ ކަމަށެވެ. މިހާރު ކުރިއަށްދަނީ ބިން ސާފުކޮށް އެއްވަރުކުރުމުގެ މަސައްކަތްތަކެވެ.

Advertisement

މި އިންތިޒާމަކީ ވަގުތީ ގޮތުން ހަމަޖައްސާފައިވާ ކަމެއްކަން މިނިސްޓަރު ފާހަގަކުރެއްވިއެވެ. ހުޅުމާލޭގައި އަޅަމުންދާ ޕާކިން ބިލްޑިންގުތަކުގެ މަސައްކަތް ނިމެންދެން މި އިންތިޒާމު ދެމިއޮންނާނެއެވެ. މިއީ ރައީސުލްޖުމްހޫރިއްޔާ ޚާއްޞަ އިސްކަމެއް ދެއްވައިގެން ކުރިއަށް ގެންދަވާ މަސައްކަތެއްގެ ބައެއްކަންވެސް މިނިސްޓަރު ފާހަގަކުރެއްވިއެވެ.

މާލޭ ސަރަހައްދުގެ ޕާކިން މައްސަލަ ހައްލުކުރުމަށް ހުޅުމާލޭގައި 15 ޕާކިން ބިލްޑިންގު އެޅުމަށް ވަނީ ރޭވިފައެވެ. މި މަޝްރޫޢުތައް ތަރައްޤީކުރުމަށް ޝައުޤުވެރިވާ ފަރާތްތަކަށް ހައުސިން ޑިވެލޮޕްމަންޓް ކޯޕަރޭޝަނުން ވަނީ ފުރުސަތު ހުޅުވާލާފައެވެ. އެ ކުންފުނީގެ މެނޭޖިން ޑައިރެކްޓަރު އިބްރާހީމް ފަޒުލް ރަޝީދު ވިދާޅުވެފައިވަނީ، ކުރިއަށް އޮތް ދެ އަހަރުގެ ތެރޭގައި މާލޭ ސަރަހައްދުގެ ޕާކިން މައްސަލަ ހައްލުކުރެވޭނެ ކަމަށް އުންމީދުކުރެވޭ ކަމަށެވެ.