ޤަވާޢިދާ ޚިލާފަށް އުޅޭ ބިދޭސީންނަށް އެހީތެރިވާ ފަރާތްތަކާމެދު ފިޔަވަޅު އެޅުމަށް ސަރުކާރުން ނިންމަވައިފިއެވެ.

ޤަވާޢިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ޙައްލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ އިރުޝާދުފުޅުގެ ދަށުން، ކުރެވޭ މަސައްކަތްތަކުގެ ތެރެއިން، އާންމު ޞިއްޙަތާއި ސަލާމަތަށް ނުރައްކާވާފަދަ ގޮތަކަށް މި ފަދަ ބިދޭސީންނަށް އެހީތެރިވާ ފަރާތްތަކާމެދު ފިޔަވަޅު އެޅުމަށް ސަރުކާރުން ނިންމައިފައިވާކަން އިއުލާންކުރެއްވީ ކޮންޓްރޯލާ ޖެނެރެލް އޮފް އިމިގްރޭޝަން މުޙަމައްދު ޝަންމާން ވަހީދުއެވެ.

މިގޮތުން، އެކްސްގައި އޭނާ ކުރެއްވި ޕޯސްޓެއްގައި ވިދާޅުވީ ޤަވާޢިދާ ޚިލާފަށް އުޅޭ ބިދޭސީންނަށް ކެއިންބުއިމާއި ނިދުމުގެ ކަންކަން ހަމަޖައްސައިދޭ ފަރާތްތަކާމެދު، ދިވެހިރާއްޖޭގެ އިމިގްރޭޝަން ޤާނޫނުގެ 33 ވަނަ މާއްދާގެ ދަށުން ފިޔަވަޅު އެޅޭނެ ކަމަށް ސަރުކާރުން ނިންމަވާފައިވާކަމަށެވެ.

މި ފިޔަވަޅަކީ އާންމު ޞިއްޙަތާއި ސަލާމަތަށް ކުރިމަތިވެފައިވާ ނުރައްކާ ކުޑަކުރުމަށް އެޅޭ ފިޔަވަޅެއް ކަމަށް ސަރުކާރުން ފާހަގަކޮށްފައިވެއެވެ.

ރާއްޖޭގައި ޤަވާޢިދާ ޚިލާފަށް އުޅޭ ބިދޭސީންގެ އަދަދު އިތުރުވަމުން ދިއިއުމާ ގުޅިގެން، މި މައްސަލަ ޙައްލުކުރުމަށް ސަރުކާރުން ދަނީ ގިނަގުނަ ފިޔަވަޅުތަކެއް އަޅަމުންނެވެ. އެގޮތުން މިފިޔަވަޅުތަކުގެ ދަށުން ގިނަޢަދަދެއްގެ ބިދޭސީން މިހާތަނަށްވަނީ ޑީޕޯޓްވެސް ކޮށްފައެވެ.