މޮސްކޯކައިރިއަށް ވަރުގަދަ ހަމަލާތަކެއްދީފައިވާކަމަށް ރަޝިޔާގެ ދިފާއީ ވުޒާރާއިން ބުނެފިއެވެ.

ރަޝިއާގެ ދިފާއީ ވުޒާރާއިން ބުނީ އެގައުމުގެ ވައިގެ ދިފާއީ ބާރުތަކުން ރޭގައި އެކަނިވެސް ޔޫކްރެއިންގެ 144 ޑްރޯން ވައްޓާލާފައިވާ ކަމަށާއި މޮސްކޯ ސަރަހައްދުން އެކަނި ވެސް 20 ޑްރޯން ވައްޓާލާފައިވާ ކަމަށެވެ.

މޮސްކޯގެ ރީޖަނަލް ގަވަރުނަރު އަންދްރޭ ވޮރޮބްޔޯވް ވިދާޅުވީ ޑްރޯންގެ ވެއްޓުމުގެ ސަބަބުން އަންގާރަ ދުވަހުގެ ފަތިހު ރާމެންސްކޯއީ ޑިސްޓްރިކްޓްގެ ދެ އެޕާޓްމަންޓް އިމާރާތަކަށް ގެއްލުންލިބި، ގިނަ ފްލެޓްތަކެއްގައި އަލިފާން ރޯވެފައިވާ ކަމަށެވެ.

Advertisement

ވޮރޮބަޔޯވް ވިދާޅުވީ ރަމެންސްކޯޔޭގައި ދިން ހަމަލާގައި އިމާރާތުގެ 11 ވަނަ ފަންގިފިލާ އާއި 12 ވަނަ ފަންގިފިލާގައި އަލިފާނުގެ ހާދިސާއެއް ހިނގައި 46 އަހަރުގެ އަންހެނަކު މަރުވެ ތިން މީހަކު ޒަހަމްވެފައިވާ ކަމަށެވެ.

އަދި 43 މީހަކު ވަގުތީ އެކޮމޮޑޭޝަން ސެންޓަރުތަކަށް ގެންގޮސްފައިވާ ކަމަށް އޭނާ ވިދާޅުވި އެވެ.

ސިޓީގެ މޭޔަރު ސަރްގެއި ސޮބްޔާނިން ވިދާޅުވީ އެ ސަރަހައްދުގެ ބައެއް ތަންތަނަށާއި ޒުކޯވޯ އެއާޕޯޓް ކައިރީގައި ވާ ސަރަހައްދަށާއި މޮސްކޯގެ އެންމެ ބޮޑު އެއް އެއާޕޯޓު އޮންނަ ޑޮމޮޑެޑޯވޯ ޑިސްޓްރިކްޓްގެ ވަށައިގެންވާ ސަރަހައްދަށް އިމަޖެންސީ ޓީމުތައް ފޮނުވާފައިވާ ކަމަށެވެ. އަދި 30 އަށް ވުރެ ގިނަ ފްލައިޓް މެދުކަނޑާލާފައިވާ ކަމަށްވެސް އޭނާ ވިދާޅުވިއެވެ.

ޔޫކްރެއިންގެ ބޯޑަރު ކައިރީގައި އޮންނަ ބްރަޔަންސްކް ސަރަހައްދުގައި ރަޝިއާގެ ދިފާއީ ވުޒާރާއިން ބުނީ 72 ޑްރޯން ހުއްޓުވާފައިވާ ކަމަށެވެ.

އަދި އިތުރު 14 ޑްރޯން ކުރްސްކްމަތިން، ޓޫލާގެ މަތިން 13 ޑްރޯން އަދި އިތުރު ފަސް ސަރަހައްދަކުން އިތުރު 25 ޑްރޯން ހުއްޓުވާފައިވާ ކަމަށް އެ މިނިސްޓްރީން ވަނީ ބުނެފައެވެ.