ތިލަފުށީގައި ރޭސިންގ އަދި ޑްރިފްޓިންގ ޓްރެކެއް އެޅުމަށް ސަރުކާރުން މަސައްކަތް ފަށައިފިއެވެ. މިކަން ހާމަކުރެއްވީ ކުޅިވަރާއި ހަށިހެޔޮކަމާބެހޭ ވަޒީރު އަބްދުﷲ ރާފިއު، މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމުގައެވެ.
މިނިސްޓަރ ރާފިއު ވިދާޅުވި ގޮތުގައި ތިލަފުށިން މި ޓްރެކްތަކަށް ބޭނުންވާ ބިން ހޯދުމަށް ހައުސިންގ މިނިސްޓްރީއަށް ސިޓީއެއް ފޮނުވާފައިވެއެވެ. އަދި މިކަމުގައި ރޭސިންގ އެސޯސިއޭޝަނާއި ޑްރިފްޓިންގ އެސޯސިއޭޝަނާ އެކު މަޝްވަރާކޮށް، އެފަރާތްތަކުގެ ކަންބޮޑުވުންތައް އޮޅުންފިލުވާފައިވާ ކަމަށްވެސް އޭނާ ވިދާޅުވިއެވެ.
މި މަސައްކަތް ފެށުމުގެ މައިގަނޑު ސަބަބަކީ ހުޅުމާލޭގައި ރޭސިންގ އަދި ޑްރިފްޓިންގއަށް ކުރިން ދޫކޮށްފައިވާ ސަރަހައްދު ބޭނުންކުރުން މަނާކުރެވިފައިވުމެވެ. މި ސަރަހައްދު ބޭނުންކުރުން މަނާކުރެވުނީ މާލެ އާއި ހުޅުމާލޭގައި ދުއްވާ ރޭސިންގ ކާރުތަކުގެ ސަބަބުން އާންމުންގެ ފުރާނައަށް ނުރައްކާވަމުން ދިއުމާ ގުޅިގެންނެވެ.
ރޭސިންގ ޓްރެކެއް ޤާއިމުކުރުމަކީ ރައީސް ޑރ. މުޙައްމަދު މުޢިއްޒުގެ އިންތިޚާބީ ވަޢުދެއް ކަމަށްވެސް މިނިސްޓަރ ރާފިއު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
