ކޮމިއުނިކޭޝަން އޮތޯރިޓީ ހޯމް މިނިސްޓްރީގެ ބެލުމުގެ ދަށަށް ބަދަލުކުރައްވައިފިއެވެ.
ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) ހޯމް މިނިސްޓްރީގެ ދަށަށް ބަދަލުކުރައްވާފައިވަނީ ޤާނޫނުއަސާސީގެ 116 ވަނަ މާއްދާގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުންނެވެ.
މި ބަދަލާ ގުޅިގެން، ކުރިން ލޯކަލް ގަވަރމަންޓް މިނިސްޓްރީގެ ދަށުން ހިންގަމުން އައި ކޭމް، މިހާރު ބަދަލުވެފައިވަނީ ހޯމް މިނިސްޓްރީގެ ބެލުމުގެ ދަށަށެވެ. ނަމަވެސް މި ބަދަލު ގެނައުމުގެ ސަބަބު ސަރުކާރުން އަދި ހާމަކުރައްވާފައެއް ނުވެއެވެ.
ކޭމްއަކީ ދާޚިލީ ސަލާމަތާ ވަރަށް ބޮޑަށް ގުޅިފައިވާ މުއައްސަސާއެކެވެ. މި ބަދަލު އައިސްފައިވަނީ ރާއްޖޭގައި މުވާސަލާތީ ވަސީލަތްތައް ބޭނުންކޮށްގެން ސްކޭމް ޖެއްސުމުގެ މައްސަލަތައް އިތުރުވެފައިވާ ދަނޑިވަޅެއްގައެވެ.
މީގެ ކުރިން، ހަޔަރ އެޑިޔުކޭޝަން މިނިސްޓްރީގެ ދަށުން ހިންގަމުން ދިޔަ ލޭބަރ ރިލޭޝަންސް އޮތޯރިޓީވެސް ވަނީ ހޯމް މިނިސްޓްރީގެ ދަށަށް ބަދަލުކުރެވިފައެވެ. މިއާއެކު، ހޯމް މިނިސްޓްރީގެ ދަށުގައި ހިމެނޭ އިދާރާތަކުގެ އަދަދު 10 އަށްވުރެ އިތުރުވެފައިވެއެވެ.
ހޯމް މިނިސްޓްރީގެ ދަށުގައި މިހާރު ހިމެނޭ މުހިންމު އިދާރާތަކުގެ ތެރޭގައި މޯލްޑިވްސް ޕޮލިސް ސަރވިސް، މޯލްޑިވްސް ކަރެކްޝަނަލް ސަރވިސް، މޯލްޑިވްސް އިމިގްރޭޝަން، ނެޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީ، ޑިޕާޓްމަންޓް އޮފް ޖުވެނައިލް ޖަސްޓިސް، އަދި ޑިޕާޓްމަންޓް އޮފް ނެޝަނަލް ރެޖިސްޓްރޭޝަން ހިމެނެއެވެ.
Advertisement
This content is created and paid for by advertisers and does not involve Voice Journalists
