ރާއްޖޭގެ މޫސުމާބެހޭ އޮބްޒަވޭޝަން ވިއުގަ އަޕްގްރޭޑްކުރުމަށް 1.5 މިލިއަން ޑޮލަރުގެ އެހީއެއް ލިބިއްޖެއެވެ. މި އެހީ ލިބިފައިވަނީ ޔުނައިޓެޑް ނޭޝަންސް އެންވަޔަރަންމަންޓް މެދުވެރިކޮށް ސިސްޓަމެޓިކް އޮބްޒަވޭޝަން ފައިނޭންސް ފެސިލިޓީންނެވެ.
މި އެހީގެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވަޒީރު ތާރިޤް އިބްރާހީމެވެ.
މި މަޝްރޫޢުގެ ދަށުން ހަނިމާދޫ، ހުޅުލެ، ކައްދޫ އަދި އައްޑޫ ސިޓީގައި ހުންނަ މެޓް އޮފީހުގެ އޮބްޒަވޭޝަން ސިސްޓަމްތައް ތަރައްޤީކުރުމަށް ވަނީ ހަމަޖެހިފައެވެ. އަދި ނ. މާފަރު އެއަރޕޯޓުގައި އިތުރު އޮފީހެއް ޤާއިމްކުރުމަށާއި، އައްޑޫ ސިޓީ ގަމުގައި ޤާއިމްކޮށްފައިވާ އަޕަރ އެއަރ (ރޭޑިއޯ ސޮންޑޭ) ސިސްޓަމް މަރާމާތުކުރުމަށްވެސް ވަނީ ރޭވިފައެވެ.
މީގެ އިތުރުން، މޫސުމާބެހޭ އިދާރާގެ މުވައްޒަފުންނަށް ބޭނުންވާ ބައެއް ތަމްރީނު ޕްރޮގްރާމްތައް ހިންގުމަށްވެސް މި މަޝްރޫޢުގެ ދަށުން ހަމަޖެހިފައިވާ ކަމަށް ތިމާވެށްޓާބެހޭ ވުޒާރާއިން ބުނެފައިވެއެވެ.
މި އަހަރަކީ މޫސުމާބެހޭ ޤައުމީ އިދާރާ ހިންގަން ފެށި ތާ 50 އަހަރު ފުރޭ އަހަރެވެ. މެޓް އޮފީސް ހުޅުވައި ޚިދުމަތް ދޭން ފެށީ 1974 ވަނަ އަހަރުގެ އޮގަސްޓު މަހުގެ 1 ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
