ފާއިތުވި 24 ގަޑިއިރުތެރޭ ގައި އެންމެ ގިނައިން ވާރޭވެހުނީ އދ.މާމިގިއްޔަށް ކަމަށް މުސުމާ ބެހޭ ޤައުމީ އިދާރާއިން ބުނެފިއެވެ.

މޯލްޑިވްސް މީޓިއޮލޮޖިކަލް ސެންޓަރުގެ ތަފާސްހިސާބުތަކަށް ބަލާއިރު، 24 ގަޑިއިރުގެ ތެރޭގައި މާމިގިއްޔަށް ވަނީ 22.5 މިލިމީޓަރުގެ ވާރޭވެހިފައެވެ.

މާމިގިލި ފިޔަވައި ދެން އެންމެ ބޯކޮށް ވާރޭވެހުނީ ބ.ގޮއިދުއަށެވެ. އެރަށަށް 18.5 މިލިމީޓަރުގެ ވާރޭ ވެހިފައިވާ ކަމަށް މެޓު އެފީހުން ބުނެއެވެ.

މޫސުމާބެހޭ ޤައުމީ އިދާރާއިން މިއަދު ވަނީ، އުތުރާއި މެދުރާއްޖެތެރޭގެ ރަށްތަކަށް މޫސުން ގޯސްވާނެކަމަށް ލަފާކޮށްފައެވެ. ހިނގަމުން މިދަނީ ހުޅަނގުމޫސުމުގެ 12 ވަނަ ނަކަތް ކަމަށްވާ "އުތުރަ" ނަކަތެވެ. އިހުގެ ދިވެހިން ބުނާގޮތުން ނަމަ މި ނަކަތުގައި ހަޅަޖަހާނެއެވެ. މި ނަކަތުގައި ހަޅަޖެހުން މާނަކޮށްފައިވަނީ ވައި ބާރުވެ ކަނޑުތައް ގަދަވުމަށެވެ.

މި ނަކަތުގެ މަސްވެރިކަން ހުންނާނޭކަމަށް ލަފާކުރާގޮތަށް ބަލާއިރު، މަސްވެރިކަން އާދައިގެ ގޮތެއްގައި ރަނގަޅުވާނެއެވެ.