މޫޑީސްއިން ދިވެހިރާއްޖޭގެ ކްރެޑިޓް ރޭޓިންގ ސީއޭއޭ1 އިން ސީއޭއޭ2 އަށް ދަށްކޮށްފިއެވެ.

މި ބަދަލު ގެނައުމުގެ މައިގަނޑު ސަބަބުތަކުގެ ތެރޭގައި ރާއްޖޭގެ ބޭރުގެ ދަރަނީގެ ސްޓޮކް އިތުރުވެފައިވުމާއި، 2025 އަދި 2026 ގައި ދައްކަންޖެހޭ ބޮޑެތި ދަރަނިތައް ހިމެނެއެވެ. އަދި ނިމިދިޔަ ސަރުކާރުން ޗާޕުކުރި 8 ބިލިއަން ރުފިޔާގެ ސަބަބުން ބާޒާރުގައި ދައުރުވާ ފައިސާ އިތުރުވެ، ޑޮލަރުގެ ޑިމާންޑް އިތުރުވެ، އެކްސްޗޭންޖް ރޭޓް ދެމެހެއްޓުމަށް ދަތިތަކެއް ކުރިމަތިވެފައިވާކަން ފާހަގަކޮށްފައިވެއެވެ.

ނަމަވެސް، ސަރުކާރުން މިހާރުވެސް ދަނީ މި ކަންބޮޑުވުންތަކަށް ރިޢާޔަތްކޮށް އަޅަންޖެހޭ ފިޔަވަޅުތައް އަޅަމުންނެވެ. މީގެ ތެރޭގައި ސަރުކާރުގެ ކުންފުނިތަކުގެ ހިންގުން ހަރުދަނާކުރުމާއި، ގެއްލުންވާ ކުންފުނިތައް އުވާލުމުގެ މަސައްކަތް ހިމެނެއެވެ. މާލީ ވަޒީރު ޑރ. މުޙައްމަދު ޝަފީޤް ވިދާޅުވެފައިވަނީ ރިޒާވްގެ އަދަދު ލަފާކުރި މިންވަރަށްވުރެ ރަނގަޅުވަމުން އަންނަ ކަމަށެވެ. އަދި ރައީސް ޑރ. މުޙައްމަދު މުޢިއްޒުގެ އިރުޝާދާ އެއްގޮތަށް ގެންނަ އިޞްލާޙީ ބަދަލުތަކާއެކު ރާއްޖޭގެ އިޤްތިޞާދީ ހާލަތު އިތުރަށް ރަނގަޅުވާނެ ކަމަށް ލަފާކުރެވެއެވެ.

ރާއްޖޭގެ ރަސްމީ ރިޒާވް އަދި ބޭނުންކުރެވޭ ރިޒާވް ވަނީ އިތުރުވެފައެވެ. މިދިޔަ މަހު ޖުމްލަ ރިޒާވް 444 މިލިއަން ޑޮލަރަށް އަރާފައިވާއިރު، ސޮވަރިން ޑިވެލޮޕްމަންޓް ފަންޑްގެ ޔޫއެސް ޑޮލަރު ކަސްޓޯޑިއަން އެކައުންޓްގައި ހުރި އަދަދު 65 މިލިއަން ޑޮލަރަށް އިތުރުވެފައިވެއެވެ. މީގެ އިތުރުން، ރިޒާވްގެ ހާލަތު ރަނގަޅުކުރުމަށް ފޮރިން ކަރަންސީ ސްވޮޕް އެރޭންޖްމަންޓެއް ގާއިމުކުރުމުގެ މަސައްކަތް ކުރިއަށްދާއިރު، ސަރުކާރުގެ ޚަރަދު ކުޑަކުރުމަށް އައު ފިސްކަލް ޕޮލިސީއެއް އެކުލަވާލުމުގެ މަސައްކަތްވެސް ކުރިއަށްދާކަން ފާހަގަކުރެވެއެވެ.

މޫޑީސްއަކީ ދުނިޔޭގެ އެންމެ ނުފޫޒުގަދަ ތިން ކްރެޑިޓް ރޭޓިންގ އޭޖެންސީގެ ތެރެއިން އެކެކެވެ. މި ކުންފުނިން ޤައުމުތަކާއި ކުންފުނިތަކުގެ މާލީ ހާލަތު ދިރާސާކޮށް، އެފަރާތްތަކުގެ ދަރަނި އަދާކުރުމުގެ ޤާބިލުކަން ވަޒަންކުރުމަށްފަހު ކްރެޑިޓް ރޭޓިންގ ދެއެވެ. މި ރޭޓިންގތަކަކީ އިންވެސްޓަރުންނާއި މާލީ އިދާރާތަކުން އިންވެސްޓްމަންޓްތަކާ ގުޅޭ ނިންމުންތައް ނިންމުމުގައި ބަލާ މުހިންމު މިންގަނޑުތަކެކެވެ.