މަގުމަތިން ބުޅާ ހިފައި، އޭގެ މަސް ކައްކައި ވިއްކި ކަމަށް ތުހުމަތުކުރެވޭ ބަންގްލަދޭޝްގެ 32 އަހަރުގެ އަރަފާތު ހުސައިން ފުރުވާލުމުގެ މަސައްކަތް އިމިގްރޭޝަނުން ކުރަމުންދާ ކަމަށް މިއަދު އެ އިދާރާއިން ހާމަކޮށްފިއެވެ.

މި މައްސަލަ އާންމުންގެ ސަމާލުކަމަށް ގެނެސްދިނީ ފީލައިން ވެލްފެއަރ އޯގަނައިޒޭޝަނުންނެވެ.

އެ ޖަމްޢިއްޔާއިން ބުނެފައިވަނީ އަރަފާތު މަސައްކަތްކުރަނީ ވަޅޯމަސް މާރުކޭޓުގައި ކަމަށެވެ. ފުލުހުން މިދިޔަ މަހުގެ 21 ވަނަ ދުވަހު އޭނާ ހައްޔަރުކޮށް އިމިގްރޭޝަނާ ހަވާލުކުރިއެވެ. އިމިގްރޭޝަނުން މިހާރު ދަނީ އޭނާ ޑިޓެންޝަންގައި ބަހައްޓައިގެން ފުރުވާލުމުގެ މަސައްކަތް ކުރަމުންނެވެ. ނަމަވެސް ފުރުވާލެވޭނެ ވަކި ތާރީޚެއް އަދި ކަނޑައަޅާފައެއް ނުވެއެވެ.

މި މައްސަލަ އާންމުވުމާ ގުޅިގެން ގިނަ އަދަދެއްގެ ރައްޔިތުން ވަނީ ކަންބޮޑުވުން ފާޅުކޮށްފައެވެ. އެގޮތުން އޭނާ ކާބޯތަކެތި ވިއްކި ތަނާއި މުއްދަތު ފަދަ އިތުރު މަޢުލޫމާތު ހާމަކުރުމަށް ކަމާ ގުޅުންހުރި އިދާރާތަކަށް ގޮވާލާފައިވެއެވެ. މި މައްސަލަ ފުލުހުންނަށް ހުށަހެޅީ އެނިމަލް ވެލްފެއަރ މިނިސްޓްރީންނެވެ. އަދި ހޯމް މިނިސްޓްރީން ވެސް މި މައްސަލަ ގާތުން ބަލަމުންދާކަން އެނގެއެވެ.

އިމިގްރޭޝަނުން ޤަވާޢިދާ ޚިލާފަށް އުޅޭ ބިދޭސީން ހޯދުމުގެ މަސައްކަތުގެ ތެރެއިން، ނުސާފު ތަންތަނުގައި ކާބޯތަކެތި ތައްޔާރުކޮށް ވިއްކާ ގިނަ އަދަދެއްގެ ބިދޭސީން ވަނީ ހައްޔަރުކޮށްފައެވެ. މީގެ ތެރޭގައި ހުތުރު ގޮތަކަށް ފޯ ހިއްކައި ވިއްކަމުންދިޔަ ބިދޭސީންތަކެއްވެސް ހިމެނެއެވެ.