ރައީސް މުޢިއްޒު މަޖިލިސް މެންބަރުންނަށް ފައިސާ ދިން ކަމަށް ބުނާ ވާހަކަތައް ސަރުކާރުން ދޮގުކޮށްފިއެވެ. އަދި އެޚަބަރު ފެތުރި މީހުންނާ މެދު ފިޔަވަޅު އަޅާނެކަމަށް ސަރުކާރުންވަނީ ބުނެފައެވެ.
ރައީސް ޑރ. މުޙައްމަދު މުޢިއްޒު، ޕީއެންސީގެ މަޖިލިސް މެންބަރުންނަށް ފައިސާ ދެއްވާކަމަށް ބުނެ ފެތުރެމުންދާ ޚަބަރުތަކަކީ ޙަޤީޤަތާ ޚިލާފު ދޮގު މަޢުލޫމާތު ކަމަށް ބުނެ ސަރުކާރުން އެ ވާހަކަތައް ދޮގުކޮށްފައިވާއިރު، އޮންލައިން ނޫހަކުން މިއަދުވަނީ އެވާހަކަ ޚަބަރެއްގެ ގޮތުގައި ޝާޢިއުކޮށް ފަތުރާފައެވެ.
އެ ނޫހުން ރިޕޯޓުކޮށްފައިވަނީ ރައީސް މުޢިއްޒު މަޖިލިސް މެންބަރުންނަށް މި މަހު 75،000 ރުފިޔާ ދެއްވި ކަމަށެވެ. މި ވާހަކަތަކާ ގުޅޭ ވީޑިއޯއެއްވެސް ޢާންމުކޮށްފައިވެއެވެ.
މި މައްސަލައާ ގުޅިގެން ސަރުކާރުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މިއީ ކަނޑައެޅިގެން ފިތުނަ އުފެއްދުމުގެ ބޭނުމުގައި ފަތުރާފައިވާ ދޮގު ޚަބަރެއް ކަމަށެވެ.
ހީނާ ވަލީދު އިތުރަށް ވިދާޅުވެފައިވަނީ މި މައްސަލަ ކަމާބެހޭ ފަރާތްތަކަށް ހުށަހަޅައި، ޤާނޫނީ ފިޔަވަޅު އެޅުމުގެ މަސައްކަތް ކުރަމުންދާ ކަމަށެވެ. އަދި ރައީސުލްޖުމްހޫރިއްޔާއާއި ރައްޔިތުންގެ މަޖިލީހުގެ މެންބަރުންނާ ބެހޭގޮތުން ފެތުރޭ މިފަދަ ދޮގު ޚަބަރުތަކާ މެދު ސަމާލުވުމަށް ދިވެހި ރައްޔިތުންނަށް ގޮވާލައްވާފައިވެއެވެ.
Advertisement
This content is created and paid for by advertisers and does not involve Voice Journalists
