ރާއްޖޭގައި ޑޮކްޓަރީ ބޭސް ވިއްކާ އަގުތައް އާދަޔާ ޚިލާފަށް މަތިވެފައިވާތީ، މި މައްސަލަ ހައްލުކުރުމަށް އަޅަންޖެހޭ ފިޔަވަޅުތައް އެޅުމަށް ކަމާ ގުޅުންހުރި އިދާރާތަކަށް ރައީސް ޑރ. މުޙައްމަދު މުޢިއްޒު މިއަދު އަންގަވައިފިއެވެ.
ރައީސް މުއިއްޒު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެއަށް އެތެރެކުރާ ބޭސް ވިއްކަނީ 200 އިންސައްތައިން ފެށިގެން 2000 އިންސައްތައާ ދެމެދުގެ ފައިދާއެއް ނަގައިގެން ކަމަށެވެ. މި މައްސަލަ ހައްލުކުރުމަށް އަޅަންޖެހޭ ފިޔަވަޅުތައް އެޅުމަށް ކަމާބެހޭ މުއައްސަސާތަކަށް އަންގަވާފައިވާ ކަމަށް ރައީސް ވިދާޅުވިއެވެ.
މި ބަދަލު ގެނައުމުން ބޭހުގެ ބާޒާރު އަގާއި އާސަންދައިން ޗާޖުކުރާ އަގު ދަށްވެގެންދާނެ ކަމަށް ރައީސް ވިދާޅުވެފައިވެއެވެ. އަދި މި ބަދަލު ގެނައުމަށް ހަމަޖެހިފައިވާ ގޮތުގެ ތާވަލާއި ތަފްސީލު އަވަހަށް އާންމުކޮށް އިޢުލާންކުރެވޭނެ ކަމަށްވެސް ވިދާޅުވިއެވެ.
ރައީސް އިތުރަށް ވިދާޅުވެފައިވަނީ މި ބަދަލުގެ ސަބަބުން އާސަންދައިން އިސްރާފުވަމުންދާ ގިނަ އަދަދެއްގެ ފައިސާ ސަލާމަތްކުރެވި، ސިއްޙީ ޚިދުމަތުގެ ފެންވަރު މަތިކުރުމަށް އެ ފައިސާ ބޭނުންކުރެވޭނެ މަގު ފަހިވެގެންދާނެ ކަމަށެވެ.
ރާއްޖޭގައި ޑޮކްޓަރީ ބޭހުގެ އަގާއި ހޮސްޕިޓަލްތަކުން ދޭ ޚިދުމަތްތަކުގެ އަގުބޮޑުކަމީ އާންމުން އަބަދުވެސް ކަންބޮޑުވުން ފާޅުކުރަމުންދާ މައްސަލައެކެވެ.
Advertisement
This content is created and paid for by advertisers and does not involve Voice Journalists
