އައިއޯއެސް 18 ނެރުމަށްފަހުވެސް އައިއޯއެސް 17 ގެ ސަޕޯޓް ދަމަހަށްޓަން ނިންމައިފިކަމުގައި އިތުބާރުހިފޭ ޓެކް ރިޕޯޓެއްގައި ބުނެފިއެވެ. 

އެޕަލްއިން އައިއޯއެސް 18 ގެ ރަސްމީ ވާޝަން ސެޕްޓެމްބަރު 16 ގައި ނެރޭނެކަމަށް އިޢުލާންކޮށްފައި ވިޔަވެސް، ބޭނުންވާ ފަރާތްތަކަށް އައިއޯއެސް 17 ގައި ދެމިތިބެ، ސެކިއުރިޓީ އަޕްޑޭޓްތައް ލިބުމުގެ ފުރުޞަތު ލިބިދާނެކަމަށް 9ޓޫ5މެކް އިން ވަނީ ރިޕޯޓުކޮށްފައެވެ.

އެ ރިޕޯޓްގައި ބުނެފައިވަނީ އައިއޯއެސް 18 ނެރުމާއެކު އެޕަލްއިން އައިއޯއެސް 17.7 ރިލީސް ކެންޑިޑޭޓް (އާރުސީ) ވެސް ނެރެން ހަމަޖެހިފައިވާ ކަމުގައެވެ. މީގެ މާނައަކީ އައިއޯއެސް 18 އަށް އަޕްޑޭޓްކުރަން ބޭނުން ނުވާ ފަރާތްތަކަށް އައިއޯއެސް 17 ގައި ދެމިތިބުމުގެ ފުރުޞަތު ލިބިގެންދިއުމެވެ.

Advertisement

އައިއޯއެސް 17.7 އާރުސީ ގައި އައު ފީޗަރތަކެއް ނުހިމެނުނު ނަމަވެސް، އޭގައި އެންމެ ފަހުގެ ސެކިއުރިޓީ ޕެޗްތަކާއި ބަގް ފިކްސްތައް ހިމެނިފައިވާކަމަށް ބެލެވެއެވެ. މިއީ ފާއިތުވި އަހަރު އައިއޯއެސް 17 ނެރުމަށްފަހު އައިއޯއެސް 16 ގެ ސެކިއުރިޓީ އަޕްޑޭޓްތައް ވަކި މުއްދަތަކަށް ދިން ފަދައިން މި އަހަރުވެސް ކުރިއަށްގެންދާނެ ކަމެއްކަމަށް އެ ރިޕޯޓްގައި ބުނެފައިވެއެވެ. 

އައިއޯއެސް 17 ގައި ދެމިތިބޭ ފަރާތްތަކަށް އައު އޮޕަރޭޓިންގ ސިސްޓަމްގެ ފީޗަރތައް ނުލިބުނު ނަމަވެސް، އައު ވާޝަންގައި ހުރެދާނެ ކުދިކުދި މައްސަލަތަކުން ސަލާމަތްވެވޭނެއެވެ. މިއީ ޚާއްޞަކޮށް މަސައްކަތަށް ބޭނުންކުރާ ފޯނުތަކަށް މުހިންމު ކަމެކެވެ.