ޑޭމެއް ފަޅައިގެންގޮސް ނައިޖީރިއާގެ ބޯނޯ ސްޓޭޓްގައި ހިނގާދިޔަ ފެންބޮޑުވުމުގެ ހާދިސާގައި 30 މީހުން މަރުވެ ހަތަރު ލައްކައެއްހާ މީހުން ގެދޮރު ގެއްލިފައިވާކަމަށް އޭއެފްޕީން ރިޕޯޓްކޮށްފިއެވެ.

ބޯކޮށް ވާރޭ ވެހުމުގެ ސަބަބުން އަންގާރަ ދުވަހު ޑޭމެއް ފުރި، އެންމެފަހުން ޑޭމް ފަޅައިގެންގޮސް ފެންގަނޑު ދޫވުމުގެ ސަބަބުން ސަރުކާރުން ބަލަހައްޓަމުންއައި ޒުލެއް ވަނީ ހަލާކުވެފައެވެ. މި ހާދިސާގައި އެ ޒުލުން ގިނަ އަދަދެއްގެ ކިނބުލާއި ހަރުފަ ވަނީ ދޫވެފައެވެ. 

ހާދިސާ އާ ގުޅޭގޮތުން އޭއެފްޕީއަށް މައުލޫމާތުދެމުން ނައިޖީރިއާގެ ނޭޝަނަލް އިމަޖެންސީ މެނޭޖްމަންޓް އެޖެންސީ (އެންއީއެމްއޭ)ގެ ތަރުޖަމާނު އެޒެކިއެލް މަންޒޯ ވިދާޅުވެފައިވަނީ، ފެންބޮޑުވުމުގެ މި ހާދިސާގައި މަރުވި މީހުންގެ އަދަދު 30 ހަށް އަރާއިރު، ބޯނޯ ސްޓޭޓްގެ އެތައް ހާސް ގެއަކަށް ފެން ވަދެފައިވާކަމަށެވެ.
"ފެންބޮޑުވުމުގެ ސަބަބުން މުޅި ސިޓީގެ ގާތްގަނޑަކަށް 40 ޕަސެންޓް ވަނީ އަސަރުކޮށްފައިކަމަށް ވެސް އޭނާ ވަނީ ބުނެފައެވެ.

Advertisement

ނައިޖީރިއާގައި ހުންނަ އދ.ގެ ރެފިއުޖީ އެޖެންސީން އަންގާރަ ދުވަހު ބުނީ ޑޭމެއް ފަޅައިގެންގޮސް ހިނގި ފެންބޮޑުވުމުގެ މި ހާދިސާއަކީ  ފާއިތުވި 30 އަހަރުގެ ތެރޭގައި ނައިޖީރިއާއަށް ކުރިމަތިވި އެންމެ ބޮޑު ގެއްލުން ކަމަށެވެ.